Nongstoiñ, K’lyngkot, 18: Ka shlem pule jong ka Christian United M.E School kaba don hapoh ka shnong Langja, West Khasi Hills District ha ka step phyrngab sngi Saitjaiñ ka la shah lied bad shah pynpra ha ki paidbah jong ki 7 tylli ki shnong kiba kynthup na ka shnong Langja, Khyllemsangrin, Umthlu, Ktiehthawiar, Mawribah, Ummawri, bad Mawjari kiba hap ruh hapoh ka shatri jong ka Synjuk ki Nongshynshar Shnong Langja Area (SNSLA).
Kum ban shu pyntip hangne ba u District Magistrate jong ka West Khasi Hills, Bah Garod L.S.N. Dykes u la pynmih da ka hukum katkum ka kyndon 163 jong ka ain BNSS, 2023, ban khanglad ia ka jingthmu ban pynpra ia ka skul Tbn.N.S. Shangdiar Memorial Secondary School kaba don ha Langja.
Katkum ki tyllong khubor ba la ioh lum la ong ba kane ka skul ka don hapdeng ka kynrum kynram namar ka jingiakam trai hapdeng ki 7 shnong bad ki riewshimet ha kaba ia ka kyrteng jong skul ruh la pynmih ar tylli bad ia kaba la tip ruh kum ka Tbn.N.S. Shangdiar Memorial Secondary School bad kum ka Christian United M.E School.
Hynrei ha kane ka step ki paidbah khlem da khein shuh ia ka kyndon ba la pynjari da u District MAgistrat ki la rah ia ki lyngka bad ki tyrnem ban lied bad pynpra naphang ïa ka skul. Shuh shuh la ong ruh ba ki bor jong ka aiñ kim shym la lah shuh ban teh lakam ïa ki paidbah namar ka jingbun shaba palat.
Kum ban shu pyntip hangne, ia kane ka skul la seng naduh ki snem 1970 shaneng bad la ju tip ruh kum ka Christian United M.E. School Langja hynrei hadien katto katne por ka shnong ka la pynkylla noh ia ka kyrteng sha ka Langja Upper Primary School bad hadien kata ia ka skul la kam nongkynti noh da ki katto katne ngut ki briew kiba na kane hi ka shnong.
U samla Denborlang Nonglait bad u samla Sumarlang Kharsyiemlieh ki la kam ba ka jingpynpra jong ka shnong ia ka skul ka dei namarba ka shnong ka la plie noh da kawei ka ïing skul kaba paka bad kaba thymmai.
