Shillong, Jymmang 30: Ka Meghalaya Tourism Development Forum (MTDF) ha ka sngi Thohdieng ka la kyntu ïa ki lad pathai khubor kiba don sha ri thor ka ri India ba ki dei ban da don lem ka jingkitkhlieh haba ki pathai ïa ki khubor na ka thaiñ shatei lammihngi.
Kane ka la jia shi sngi hadien ba kawei ka kotkhubor ka la pynpaw ïa ka Meghalaya kum ka “crime prone hill” haba pynmih ïa ka khubor shaphang ka jingjah rngai jong ki arngut shikurim na Madhya Pradesh, katba ki dang leit “honeymoon’ ha Sohra, kaba la bna nam kum kawei na ki jaka ba khring bha ïa kiba wan jngohkai na kylleng ka ri India bad nabar ri.
Haba kren sha ki lad pathai khubor u President ka MTDF u Bah Larsing Sawian u la ong, “Ngi kwah ban phai sha kawei ka jingthoh kaba ym poi pyrkhat kaba la mih ha kawei ka kot khubor national daily ha ka sngi Palei ha kaba ki jaka lum jong ngi la shah khot kum ka crime prone hill. Kane kadei ka jingkynthoh kaba ma naba ka kdew ba ka Meghalaya ne ka Khasi Hills ka dei ka thaiñ kaba jur bha ki kam sniew bad kam runar, kaba kane ka la ïalam bakla bad kaba dei ban pynrem jur.”
“Baroh ngi tip ba ngi dei kiba ieid ïa ka jingsuk bad ki nongshong shnong jong ngi ki ju pdiang sngewbha ïa ki nongwan jngohkai bad kam pat ju don kano kano ka jingjia kaba ïadei bad ki kam sniew ne kam runar ha kaba ïadei bad ka jingwan ki nongwan jngohkai sha Meghalaya,” u la ong da kaba bynrap, “Kane ka jingthoh kaba pynpaw dak sniew ïa ka Meghalaya ka long kaba ym poi pyrkhat bad kumta ngi shim ïa kabu ban kyrpad ïa kiba pynmih khubor, ki news network kiba la pynmih ïa kane ka jingthoh ba kin pynshai ïa kane kaba ki la pynmih naba kane kan ktah bha halor ka roi ka kiew jong ka kam jngohkai ha ka jylla ne ban ïoh ka jingshaniah na ki briew na ka bynta ban khring ba kin ïaibteng ban wan jngoh ïa ka jylla Meghalaya.”
Haba pynpaw ka jingsngewkhia halor kane ka jingjia, u Bah Sawian u la ong, “Ka long kaba sngewsih ba haduh mynta ïa kine ki shikurim ym pat lap satia bad ngi kyrmen ba da kane ka jingbteng ban wad ngi kyrmen ba yn shem ïa ki lyngba ki lad jingïada.”
U la ong ba ka Meghalaya kadei ka jylla kaba la kiew kum ka jaka pdeng kiba wan jngohkai khamtam ha kine ki 10 snem ba la leit bad shuh shuh ha kine ki 5 snem ba la ïaid. Ki thaiñ kum ka Sohra, Cherrapunjee, Dawki bad baro kawei ka thaiñ South Khasi Hills ki dei ki thaiñ kiba la kiew sted ha ki kam jngohkai bad ka rural tourism mynta shisha ka la long hakhmat jong ka jylla Meghalaya.
“Ha ka jingshisha, haduh mynta ki briew kiba wan sha Meghalaya ki kham jied bha ban leit sha kine ki thaiñ ban ïa kaba wan sha Shillong bad kane ka dei ka jingshisha kaba kaei kaba ngi don mynta. Kane kadei ka lynti kaba ki ong ka game changer na ka bynta ka ïoh ka kot ha ki thaiñ nongkyndong ka Meghalaya bad ki paidbah ka Khasi Hills bad ka Meghalaya ka la kdup ïa ka tourism naba ngi ïohi ïa ka kum ka lad ka kabu na ka bynta ki nongshong shnong bad ba ki briew kin ïohkam ïohjam bad ka kamai kajih.”
Haba ong ba ka North East India ka la kiew ha ka ïoh ka kot bad ka roi ka san, u Bah Sawian u la ong, “Ngi la don ha ka kyrdan ka jingïakhun ha kaba ïadei bad ka jingkiew jong ka ri India ha kaba ka jingïasoh ka ïoh ka kot jong ka North East bad ka South East Asia bad ka ri baroh kawei ka long kaba donkam ha kane ka por.”
Haba phai sha ka jingjia ha Pahalgam, u la ong ba ki don ki kynhun kiba ktah ïa ka roi ka san jong ka ri bad kiba la trei ruh ban pyntlot ïa ka ri ha ka por ba ka ri ka la sdang ban tam ïa ka ri Japan kum ka third largest country jong ka pyrthei haba ïadei bad ka GDP.
Haba kyrpad ïa ki lad pathai khubor na ri thor u President ka MTDF u la ong, “Ka khana ka jingkiew ka North East ka la sdang bad ka la nang ïaid shakhmat bad ka la dei ka por ban kyrpad ïa ki national media ba kin long kiba kitkhlieh kumno ba kin pynmih ïa ki khubor kiba wan na North East.”
“Ngi long kiba kloi ban pdiang ïa ki jingkynthoh kaba ngi dei hok ban pdiang bad ngi long ba la khreh pat ban rah ïa ki kti lada don kano kano kaba donkam ban pynshai, hynrei ïa ki jingbym shisha la dep phah sha ki national media bad la dep ruh ban shon na ka bynta ki nongpule jong ki nongshong shnong ka ri ha kaba kine ki dei ki kam kiba ym lah ban pdiang kum ka ri kumta ngi shim kane ka kabu ïa ki lad pathai khubor na ri thor ba kim dei ban pynlong ïa ka khubor na ka bynta ka jingsngew kiba ym dei kiba bha bad dei ban sngewthuh ba ngi kwah ki khubor kiba tei ïa ka ri,” u la ong.
 | ReplyForwardAdd reaction |
