Shillong, Naiwieng, 04: Ka seng kieng atiar Hynñiewtrep National Liberation Council (HNLC) ka la pynrem jur ïa ka jingshah kem dang shen jong ki khyndai ngut ki samla na Khliehshnong, Sohra, hadien ka jingjia ha ka 30 tarik, Risaw.
Katkum u kyrwoh ba la phah da ka seng, kane ka jingjia ka dei namar ka jingpynkhihwin jong ki ophisar Sorkar bad ki Pulit, bad ka kyntait mardor ïa ki jingpyrshang ban niew ïa ki jingleh jong ki paidbah kum ka “jingleh donbor ki paidbhur”.
Ki khyndai ngut ki samla kiba la ithuh kum ki nongkynshoit ïa ki paidbhur ki la shah kem hadien kumba 200 ngut ki paidbah ki la kerkut ïa ka iing jong u Bah Ham Shangpliang ha Khliehshnong, Sohra ha ka 31 tarik, Risaw, 2025 halor ka jingkynnoh menaiksuid.
“Kine ki jingshah kem ki long sa kawei pat ka nuksa jong ki bor ka aiñ, kiba thmu ban thombor ïa ki samla jong ngi hynrei ki bym lah ban ïada ïa ki paid Hynñiewtrep na ki jingma kiba shisha bad ki jingbymhok kiba ïai bteng,” ong u General Secretary ka HNLC u Bah Saiñkupar Nongtraw ha u kyrwoh ba la phah sha ki lad pathai khubor ha ka sngi Baar.
“Ka kynhun ba la khot Special Operations Team bad kiwei kiwei ki bor “ïaleh” ki lah ban pyni ïa ka dur jong ka jingkhlaiñ ha Shillong, hynrei ki la iehnoh ïa ki jingkyrpad jong ki briew jong ngi ha ki jaka khappud. Hynrei haba ki la nud ban rung shapoh Khliehshnong, Sohra, ki la ïatakhuh ha ka jingshlur bym lah pynkhih jong ki samla jong ngi, kiba la pynbor ban randien. Ha kato ka miet, ki paidbah ka Khliehshnong ki la pyni ïa ka mynsiem ïaleh ba shisha jong ka Hima Sohra. Ki Pulit kiba la pynkhreh bha ïa ki tiar ïaleh bad kiba la shah pyntbit kyrpang, ki la phet krad kum u myrsiang hakhmat u khla, khlem da lah shan ïa ka jingïatylli jong ki samla jong ngi,” u la kynnoh da kaba bynrap, “Kane ka jingjia ka pynpaw pyrthei ïa ki jinglong arsap jong ki Pulit Meghalaya, kiba shlur ban pynibor ïa ki bym donbor, kiba khawpud ban ïakhun ïa kiba ïakhun pyrshah. Ka pynshisha ïa kaei kaba u Hynñiewtrep u la tip lypa naduh mynshwa ïa la ki briew jong ngi, haba ki ïatylli, ki khlaiñ ban ïa kiba phong uniform ne ïa kiba don tiar ïaleh.”
U Bah Nongtraw u la ong ba ka HNLC ka kyntait mardor ïa kano kano ka jingpyrshang ban niew ïa ki trai shnong kum ki nongpynkheiñ aiñ.
“Ka jingjia ha Khliehshnong kam dei ka jingleh donbor jong ki paidbah hynrei ka dei ka jingmih beit na ka jingpynkhihwin ba la thmu da ki ophisar Sorkar bad ki Pulit ha kato hi ka miet. Ka jingleh arsap, ka jingpyntieng, bad ki jingleh heh jong ki ka la pynmih ïa ka jingbitar bad ka jingtieng hapdeng ki samla, kaba lam sha ka jingïaleh pyrshah. Ngim ym ailad satia ba ïa ka jingjia yn kam ba ka dei ka “jingleh donbor jong ki paidbah” katba ki nongkynshoit ba shisha ki dei kito kiba don ha ka Uniform bad kiba don ha ka bor kim shah pynshitom namar ka jingpyndonkam bakla jong ki ïa ka bor bad namar ka jingpynkheiñ ïa ka burom jong ki paidbah,” u la ong haba pynpaw ïa ka jingdonlang bad ki paidbah ka Khliehshnong bad pynrem ïa ka jingpyrshang jong ka Sorkar ban ñiew ïa ki lanot kum ki nongleh kam sniew.
