Shillong, K’lyngkot, 31: Ka Meghalaya Indeginous Women’s Council (MIWC) lyngba ka President ka Kong Bythygrace Dkhar ka la pynrem jur ïa ka jingshah pynïap dusmon jong kawei ka longkmie ba la tip kyrteng kum ka Kong Ngildres Dkhar kaba shong ba sah ha Ladrymbai Dongwah ïa kaba la kynnoh ba la leh da uwei bar jylla ïa uba la tip kyrteng kum u Saidul Alom uba sah wai ha iing jong kane ka longkmie kaba lah shah pynïap.
Ka Seng ka ai khublei ïa ki Pulit ka Ladrymbai Police Outpost ki la trei shitom ban thwet bad ban kem mardor ïa u runar uba la bthat jubor ïa ka jingim jong ka Kong Dkhar ha ka 27 tarik mynta u bnai bad da kaba khang tala bad iehnoh ïa ka met hapoh ka iing sah jong kane ka longkmie.
La lap ïa ka Kong Dkhar ba la thiah ïap ha ing sah ha ka 29 tarik mynta u bnai hadien ba ki Pulit ki la pynpait ïa ka jingkhang iing.
Ka seng ka kyntu jur ïa ki trai iing kiba aiwai iing sha ki bar jylla ba ki dei ban da hushiar bha haba ai iing wai sha ki bar jylla bad ka seng ka kyrpad ruh ïa ka Sorkar ban pynshitom tyngeh bad ban set along ïa u runar uba donkti ha kane ka kam bymman.
