Shillong, Ïaïong, 29: Ki samla pule jong ka skulbah North Eastern Hill University (NEHU) ha ka sngi Baar ki la pynlong da ka jingïaid rally bad ka Signature Campaign ban pyrshah ïa ka jingshah kem jong u President ka NEHU Student’s Union u samla Sandy Sohtun bad ïa ka jingrung jong ki Pulit ha phyllaw jong ka skulbah ha ka Lah Sngi u Blei.
“Ngi ieng pyrshah ïa ka jingrung ki Pulit ha ka jaka pule,” bad “ka jingwanrah ïa ki bor Pulit hapoh ka skulbah ka ktah ïa ka bor pyrkhat pyrdaiñ bad ka jinglong kyntang jong ka skulbah”, “ngi ieng skhem halor ka nongrim ban pyrshah ïa ka jingleh donbor da ki bor jong ka aiñ ban shu kem be-aiñ ïa ki samla pule,” ki long ki katto katne ki jingthoh ba la rah da ki samla pule ha ki plakad ha ka jingïaid rally ba la pynlong da ka North Eastern Hill University Students’ Union (NEHUSU), kaba la khot pynlong ruh ïa ka jingsangeh shong klas ba khlem pud sngi.
Haba kren sha ki samla pule, u General Secretary jong ka NEHUSU u samla Toniho Kharsati u la ong, “ngim lah satia ban pdiang ïa ka jingshah kem jong u samla Sandy Sohtun namarba ki bor Pulit kim shym la bud katkum ki kyndon. Ki Pulit kiba wan kem ïa u samla Sandy Sohtun ki dei kiba riam jaiñ paidbah. Kim shym la pynithuh hi ruh ïalade ba ki dei ki Pulit haba ki wan ban kem ïa u President. Ha ka por ba ki Pulit ki kem ïa u samla Sandy na Canteen, ki la kem lang ruh ïa uwei u samla pule uba la ki la pynhiar noh na kali ynda la poi ha Gate-5 halor ka nongrim ba la shu kem bakla. Halor kane ka jingjia ngi buh jingkylli la ki Pulit ki dei kiba pynneh ïa ka shongsuk shongsaiñ haba ki shu wan ban rah ïa ki samla pule bad bret noh tang ha shiteng lynti.”
U la ong ba ka NEHUSU ryngkat bad ka KSU-NEHU Unit ki la pynrem jur ïa ka jingleh jong ki Pulit. “Ngim pyrshah ïa ka tnat Pulit namarba ki Pulit ki hap ban peit ïa ka shongsuk shongsaiñ hynrei kaei kaba la jia hynnin ka sngi ka long ba ki Pulit kim shym la phong ïa ka Uniform haba ki wan kem bad kane ka la pynlong ïa ngi ban buh jingkylli.”
Da kaba kdew ïa ka jingjia ïa u DK Basu Case, u samla Kharsati u la kdew ba katkum ki kyndon la kdew shai ba ki Pulit ki dei ban don ha ka Uniform haba ki kem ïano ïano bad ong ruh, “balei pat kim lah ban bud ïa kine ki kyndon (haba ki wan rung shapoh ka Campus jong ka skulbah ban kem ïano ïano).”
Shuh shuh u la kynthoh ruh ïa ka tnat Pulit da kaba ong, “tang ban ai jingïada ïa uwei u nonghikai, phi wanrah haduh 140 ngut tam ki Pulit bad ki CRPF. Kane ka jingjia ka dang dei tang ka jingkynnoh haduh mynta, ki Pulit ki dang pynlong ïa ka jingtohkit hynrei balei yn hap ban da shim kyrpang ïa kane ka kam. Nalor kata, ka jingwanrah ïa ki bor Pulit ka long khlem ka jingïoh jingmynjur na ki bor pynïaid jong ka skulbah. Ki shu wan bad ki shu kem ïa ki samla pule bad ki ïaid pahara wat shaduh ki hostel ba sah ki khynnah.”
Haba kynthoh ruh ïa ka Sorkar Jylla u samla Kharsati u la ong, “haba ngi kyrpad ïa ka Sorkar ban tuklar lem ïa ka jingjia ha NEHU, ka jubab kaba ngi ïohi ka long ba ka Sorkar kam lah ban tuklar ïa u pud u sam jong ka NEHU hynrei mynta pat kumno ki wanrah ïa ki Pulit khlem ka jingmynjur jong ki bor pynïaid ka skulbah. Ngi pynrem jur halor kane ka jingleh bad ngin ym lah hi ruh ban pdiang daleilei.”
“Ngi mynjur ban ïatreilang. Lada phi kwah ban tohkit, ngi long kiba kloi ban ïatreilang hynrei ngim lah pat ban pdiang kum ïa kane ka jingleh kaba la wan jia hapoh ka skulbah bad ban kem ïa ki samla pule. Ngin pyrshah kum ka NEHUSU. Lada ki Pulit ki don ha skulbah, ngin ym sangeh satia ban pynlong ïa ka jingsangeh shong klas kaba khlem pud sngi kum ka dak ban pyrshah ïa ka jingtuklar jong ka tnat Pulit,” u la ong shuh shuh.
