Shillong, Iaiong 12: Ka Shillong All Faiths Forum (SAFF) kaba ïeng na ka bynta ka shongsuk shongsaiñ, ka jingïasngew shipara bad ka hok, ka la pynpaw ïa ka jingsngewkhia halor ka jingshah pynïap dang shen ki bar jylla ha ka shnong Ichamati bad ha Mawlai Mawroh.
Katkum ka kyrwoh khubor ba la pynlait da u secretary u Rev. Fr. Richard Majaw u la ong, ka SAFF ka banjur bad ka kyrpad ïa baroh ki nongshong shnong ban pynneh ïa ka shongsuk shongsaiñ, ka jingïasngew shipara hapdeng baroh ki jaitbynriew kiba sah ha ka jylla bad ba kin kiar na kino kino ki kam kiba wanrah ïa ka jingisih bad ki jingïaumsnam.”
“Katba ngi dang ïaid sha ka jingïashim bynta ha kane ka ilekshon sha ka Lok Sabha ka ban sa long ha ka 19 tarik mynta u bnai, ngin pynneh ïa ka jinglong kaba jai jai bad kiba pyrkhat ïa ka suk ka saiñ. Ngi kyrpad ïa ka Sorkar bad ki bor synshar Sorkar ban ïada ïa ki nongshong shnong bad ban ïada na kum kine ki jingjia ïaumsnam hapoh ka jylla,” u la ong
“Ngin ïasnohkti lang ha ki jingduwai khnang ba ngin lah ban im ha ka suk ka saiñ bad kum shipara,” ong u Secretary ka SAFF.
Ha kajuh ka por, ka Voice of the People Party (VPP) ka la pynpaw ba kum ka party kaba burom ïa ka Riti Synshar jong ka Ri India bad ïa ki nongrim jong ki aiñ ka pynrem jur ïa ka jingpynïap im im peit peit ïa uwei u nongbylla misteri bar jylla ha Mawlai Mawroh dang shen.
“Mano mano ruh kim donhok ban shim ïa ka mynsiem jongno jongno. Ka hok ban im ka dei ka hok longbriew manbriew jong uwei pa uwei u briew la u dei na kano kano ka jaitbynriew, ka jait ne ka niam bad ïa kane ka hok la pynskhem ha ki aiñ satlak ka pyrthei bad ka Ri,” ong u nongaiktien ka VPP Dr. Batskhem Myrboh.
“Ngi kyntu namarkata ïa ka Sorkar Jylla ban shim ïa ki lad ki lynti ban pynthikna ba ka aiñ ka dei ban treikam bad ba kiba donkti kin ïoh ïa ka jingpynshitom katkum ki kyndon,” u la ong bad bynrap, “kane ka jingjia ka la pynjah burom shikatdei eh ïa kane ka jylla jong ngi kaba la bna nam namar ki kam pynkheiñ aiñ bad ki kam bamsap ba la leh da kito kiba don ha ka bor.”
