KA SORKAR KA DEI BAN PYNKHLAIÑ IA KA NARCOTIC ACT
Shillong, Naiwieng 08: U MLA jong ka North Shillong Constituency u Bah Adelbert Nongrum ha ka sngi balang u la pynpaw ka jingpyrshah bad pynrem jur ia ki briew kiba donkti ban die pylleiñ pylleiñ ia u drok hajan ka Sweeper Lane mar pyrshah ka Bhutia Market ha ka lah sngi U Blei ia kaba la ioh ban ring video da ki nongleit nongwan bad pynsaphriang ha ka rynsan Social Media.
“Nga pynpaw ia ka jingpyrshah bad ka jingpynrem halor ka jingjia ha ka 6 tarik, Naiwieng 2023 halor ka jiingiadie iathied ha kaba iadei bad u drok haba shit haba shai la kum ba die kwai die sikret khlem don jingtieng ne burom shuh ha ka jaka kaba don mar pyrshah ia ka Bhutia Market hajan Sweeper’s Lane ha kaba nga ngeit ba baroh ngi la iohi ba ka la saphriang ha ki Social Media bad kane kan long ka thma pyrshah ia u drok,” ong u Bah Adelbert ha u kyrwoh ba la phah sha ki lad pathai khubor.
“Nga ai ka jingiaroh ia ki briew jong ka aiñ kiba la pyrshang ban trei shitom na ka por sha ka por bad ngi sakhi ia ka jingioh kurup ia kine ki jingdih buaid na ki kali paidbah, na ki kali Sorkar ka ban wanlam ka jingduh jingshahniah balei ki jia kumne,” u la ong.
“Ka Sorkar ka dei ban shim kyrkieh ia ka jingkit khlieh kumno ban pynkhlaiñ ia ka tnat Pulit bad ban pyntreikam da ka buit thymmai ban phong da ki riam ki ban nym pynithuh ialade ba ki dei ki briew jong ka aiñ (plain clothes) bad ban pynkhlain ia ka jingiaid syntiat (patrolling),” la ai jingmut u Bah Nongrum.
“Ka Sorkar ka dei ban shim kyrkieh kloi kloi ban pynkhlaiñ ia ka Narcotic Act kaba long synjor kumba long mynta. Hooid khlem pep kan dei ka jingiatreilang na baroh ki liang, hynrei ka Sorkar kum ka Kmie ka dei ban pyntreikam pyrkhing ban khanglad ia ka jingwan rung laitluid jong kine ki jingsniew sha kane ka jylla ka jong ngi,” u la bynrap.
“Kan long lehnohei bad sepei lada ngi trei borbah napoh hynrei ka jingpyrkhing pat kam don, ki jingsniew kin nang ioh ban rung laitluid, kum ban pynkynmaw ha ki por jong ka Covid-19 ladon ka jingpyrkhing ia ki briew baroh shuwa ban rung sha ki jylla ban hap ban pyndep shuwa ia ki kyndon ha Byrnihat Entry Check–Gate bad lada ka Sorkar ka don ia ka jingkitkhlieh ia la ka jong ka jylla bad khamtam ka jingieid ia ki khun samla kan pyntreikam kumjuh na ka Entry Check-Gate Byrnihat, lym kumta kane ruh kan long kum kawei pat ka khlam ka ban ym lah ban ioh ia ka dawai ban pynkhiah,” u la ong.
“Lyngba kane nga ngeit ba ngin lah ban pynduna, ngin lah ban tehlakam bad ban pynsangeh (reduce, control & stop), namar kumba ka long mynta ka jingkhaii bad ka jingdawa ka long laitluid,” la bynrap u Bah Nongrum.
