Shillong, Risaw, 26: Ka Hynñiewtrep Youth Council (HYC) West Khasi Hills District ha ka sngi Palei ka la dawa ia ka Khasi Hills Autonomous District Council (KHADC) ban ainam ia ka thain Langpih, ka shnong kaba hap hapoh u pud u sam jong ka West Khasi Hills District da kaba tei ia u durmot ba shi rynieng jong u (L) Bah Hoping Stone Lyngdoh uba la long u MDC bad u MLA la bun bun snem jong ka Nongstoiñ Constituency.
Kane ka jingdawa jong ka HYC ka long hadien ba ka District Council ha ki snem ba la leit ka la kular ban tei da u durmot ba shi ryngieng jong u (L) Bah Hoping Stone L. Nonglait.
Ka seng hapoh ka jingialam jong u President u samla Lumlang Kharsyiemlieh ka la aiti ia ka dorkhas ha u Chief Executive Member (CEM) jong ka KHADC u Bah Pyniaid Sing Syiem kaba la bsut ruh ia shibun ki jingdawa.
Ha ka jingiakren bad ki lad pathai khubor, u President ka HYC u Samla Kharsyiemlieh u la iathuh ba u Bah Hoping uba la long MDC la bun bun snem bad uba long teng u Chief Executive Member (CEM) jong ka District Council, la sngewdei ban tei noh ia u dur mot ba shi rynieng bad ruh ban don ka Signboard sah jingkynmaw ia u ha ophis treikam jong ka KHADC ha Nongstoin.
