Shillong Jyllliew, 12: Ka Ingbishar Meghalaya High Court ha ka 12 tarik Jylliew, 2025 ka la pynsangeh noh ïa ka jingpyntreikam jong ka hukum ba la pynmih da ka Executive Committee ba la ïalam da ka Voice of the People Party ha KHADC ha ka 30tarik Jymmang, 2025 kaba pyndam noh ïa ka jingpynskhem ïa ka kam jong ki 30 ngut ki nongtrei Casual.
Ka hukum ba la pynmih ha ka 30 tarik, Jymmang 2025 ka la ong ba la pyndam noh ïa ka jingpynskhem ïa ka jingshakri jong ki naduh ka 1 tarik, Jylliew, 2025 namarba la leh katkum ki kyndon treikam. Hynrei ka jingthung ïa ki kum ki nongtrei Casual kan dang ïai bteng.
Da ka jingsngewsih halor ka hukum ba la pynmih da ka KHADC, ki 26 ngut ki nongtrei ki la leit ujor sha ka Iingbishar ban tuklar. Hadien ba la sngap ïa ka jingujor jong ki, ka Single Bench kaba la khlieh da u nongbishar B. Bhattacharjee ka la ong, “da kaba pyrkhat ïa ki jingkdew haneng, ha kane ka por, la shim ba ka long kaba dei ban pynsangeh noh ïa ka jingtreikam jong ka Office Order No.357 kaba la pynmih ha ka 30 tarik, Jymmang, 2025 tad haduh ka tarik ban shong bishar biang ïa kane ka kam.”
Uwei na ki nongtrei, u Banrikupar Suting u la kyrpad ban pynsangeh noh ïa ka Office Order No. 357 kaba la pynmih ha ka 30 tarik, Jymmang, 2025 ba la pynmih da ka KHADC ha kaba la pyndam noh ban pynskhem ia u kum u Enforcement Constable bad la ailad ba un dang bteng ia ka kam kum u Casual Enforcement Constable.
Ka hukum ka la ong ba ka paw na ki jingai jingmut ba la ai na ka bynta ki liang pyrshah bad ki tiar kiba don ha ka rekod ba ïa u nongaplai la thung kum u nongtrei Casual katkum ka hukum jong ka Office Order No. 528 ‘B’ dated 01 .0 6.2019. Hadien ba la pyndep kumba 5 snem ka jingshakri kum u Casual Enforcement Constable, lyngba ka Office Order No. 585 kaba 14.08.2024, la pynskhem ïa ka jingshakri jong u kum u Enforcement Constable da ka rai jong ka Executive Committee jong ka Khasi Hills Autonomous District Council.
Hynrei da ka hukum jong ka Office Order No. 357 kaba 30 tarik, Jymmang,.2025, ka jingpynskhem ïa ka kam jong u kum u Process Server la pynsangeh bad la ailad biang ban trei kum u Casual Enforcement Constable.”Ka hukum jong ka ophis, kam pyni ba ïa u nongmudui la pynmih da ka jingpynbna ne la ai kano kano ka lad ban bishar shwa ban shim ïa ka rai ban pyndam noh shwa ban shim ïa ka rai ban pynkylla noh ïa ka jingpynskhem kam kum u Process Server,” la ong ka ïingbishar.
“Watla ha ka Office Order, ka jingpynskhem ïa ka kam jong u nongaplai hadien ba la pynpaw ba ka kyndon ba treikam ka dei ka daw jong ka jingpyndam noh ïa ka jingpynlong ryntih ïa ka jingshakri jong u nongaplai, ym shym la thoh eiei kaba kyrpang ban pyni ba kano ka bynta kyrpang jong ka kyndon ba treikam ym shym la bud katba dang pynlong ryntih ïa ka jingshakri jong u nongaplai,” la ong ka hukum.
Kum ban shu pynkynmaw hangne ba ha ka 3 tarik jylliew 2025, u CEM ka KHADC Bah Shemborlang Rynjah u la pyntip ba ka Executive Committee ka la weng kam ïa ki 13 ngut kiba la thung thymmai bad la pyndam noh ïa ka jingpynskhem kam jong ki 30 ngut ki nongtrei Casual hadien ba la thungkam ïa ki khlem kano kano ka post ba la mang.
