Shillong, ïaïong, 11: Ka Iingbishar Meghalaya High Court ka la bthah ïa u Special Judge (CBI) ba un sangeh shwa ban tohkit bniah ïa ki nongai sakhi halor ka jyrsieh thungkam nonghikai ha u snem 2009 tad haduh ka por kaba u la sngew ba la lah ban pynkut noh ïa ka aplikeshon kaba pan ban pyndam noh ïa ka jingbishar
Ka Bench ba la khlieh da u Chief Justice IP Mukerji ha ka hukum ba la pynmih ha ka sngi Thohdieng ka la ong, “kane ka Iingbishar kam shym la pynsangeh ïa ka jingbishar hynrei ka shu kyrpad ïa u Special Judge (CBI) ha Shillong ban sangeh shwa ïa ka jingbishar bniah ïa ki sakhi tad haduh ka por ba u la sngew ba kane ka Iingbishar kan pynkut ïa ka jingbishar ïa ka jingujor kaba dang sahteng bad ban pynbna ïa ka rai.”
U nongshah kynnoh hapoh ka Section 482 jong ka Criminal Procedure Code u la kyrpad ban pyndam noh ïa ka jingshah mudui kam runar ba la ujor pyrshah napdeng jong ki, ka Myntri kaba khmih ïa ka tnat Ain, ka la shah kynnoh ba ka donkti ban leh thok ha ka jingthungkam nonghikai.
“Kane ka Iingbishar ka la sdang ban bishar ïa kane ka jingujor. Lada kane ka jingaplai ka jop, kata, kan long ka jingkut jong ka jingbishar. Lada kam long kumta, ka jingbishar ka lah ban bteng. Ha ka jingsngew jong nga, kam don jingmut ban bteng shuh ïa ka jingbishar bniah ha kane ka kyrdan shwa ban pynkut noh ïa ka jingkyrpad hapoh ka Section 482,” ong ka ïingbishar.
La bthah ïa u Salman Khurshid uba dei u Senior Advocate uba la mihkhmat ïa ki nongshah kynnoh hapoh ka Section 482 CrPC ban bteng ïa ki jingïasaid hapoh ka Section 482. U Khurshid u la ïai bteng ban ïasaid hynrei um shym la lah ban pynkut.
“Buh sngi ïa kine ki kam ha ka 7 tarik, bad 8 tarik, Jymmang, 2025 ha ka por 12.30 baje noh sngi lane hadien ba la pynkut ïa ki kam jong ka Division Bench, kaba lah ban long kham kloi,” la bthah ka Bench
Ha kaba ïadei bad ka hukum ba la pynmih da ka Iingbishar ha ka 20 tarik, Rymphang, 2025 ka la shem kiba bun na ki nongai sakhi la tyrwa ban pynduna noh khnang ban pynstet ïa ka jingbishar. Haoid, kam donkam ban ong ba kum kane ka jingduna ïa ki nongsakhi kan ym pynduh noh ïa ka jingbïang jong ki sakhi ban wanrah ha kane ka jait kam,” la ong ka Bench.
La pyntip sha ka Iingbishar la rai ban weng 317 ngut na ki 492 ngut ki nongsakhi bad ban pynrung sa pat sa hynriew ngut ki nongai sakhi.
La pyntip sha ka Iingbishar ba ïa ka jingkyrpad la shah da u nongbishar. Shwa kane, ladep ban bishar bniah ïa ki 28 ngut ki nong ai sakhi. Ka tarik kaba bud ban bishar ka long ha ka 5 tarik, Jymmang. Katkum ka jinglong ba mynta, ka jingbishar kan ïaid noh shakhmat.
