Shillong, Lber, 21: Ka Addl. Deputy Commissioner kaba khmih ïa ka Pynursla Civil Sub-Division Kong EL. Warjri ha ka sngi Thohdieng ka la pyntip ba ka jingkhang ïa ka shi lynter kaba 23 kilomitar jong ka surok Shillong-Dawki ha ka shnong Rngaiñ, East Khasi Hills District ha ka sngi Palei naduh ka por 9:30 baje haduh 11:00 baje kam dei satia na ka jingkhynñiuh u jumai hynrei ka dei kum shi bynta ka jingpynkhreh kumno ban ïada lada jia ba wan shisha ka jingkhynñiuh jumai ba la pynlong ha Sub-Divisional Level jong ka Pynursla Civil Sub-Division, Pynursla.
Ka ADC ka ong, ki la don ki riewpaidbah kiba la mutdur bakla ba la jia ka jingkhynñiuh jumai na ka daw ka jingtwa khyndew ha kane ka jaka ba la kdew ïa ka tarik bad ka por.
Hynrei, la pynshai hangne ba la khang tang shipor ïa ka surok da ka jingthmu ban ki lan met lypa bad shwa kane ladep ban ai jingpynbna ruh lyngba ki rynsan pathai khubor.
“Ngi da sngewnguh shikatdei eh ïa ka jingïaishah bad ka jingïatreilang jong ki paidbah bad ngi sngewsih lada don kino kino ki jingsngewthuh bakla halor ka jingpynlong ïa kine ki jingpynkhreh lypa ki long kiba donkam khnang ban pynthikna ïa ka jingshngaiñ jong ki paidbah lada jia kino kino ki jingjia ba sngewsih na ka jinglynshop mariang kiba lah ban wan jia shisha ha kano kano ka por,” la ong shuh shuh ka ADC ha u kyrwoh.
