Shillong, Nailur, 02: Ki Pulit ka East Khasi Hills District ha ka sngi Baar ki la pyntip ba katkum ka jingtohkit kaba bniah kam shym la don satia ka jingshah thung thyrnia injekshon ïa ka khynnah kynthei ba la 16 snem kumba la kam ha ka ejahar.
U kyrwoh ba la phah da u Superintendent of Police ka East Khasi Hills u Bah Vivek Syiem u la pynshai, “ha ka 18.08.2025, ki Pulit ka Lumdiengjri Police Station ki la ïoh pdiang ïa ka jingpyntip ba kawei ka khynnah kynthei ba dang rit ka rta la kynnoh ba ka la shah dung da u thyrnia injekshon na ka tyrpeng ka kti ka mon ha ki arngut ki briew bym lah ban ithuh kiba shong da ka thuk thuk ar shaka kiba kup da ki helmet hajan ka Bible Society of India, Jaïaw. Kane ka jingjia ka la pynbitar bad pynlong ruh ïa kiba bun ki paidbah ban sngew syier mynsiem.”
“Namarkata, ïa ka case la rejistar ha Lumdiengjri PS hapoh ka Case No. 108(08)2025 ha ka Sections 123/125 jong ka BNS bad la pynlong ruh ïa ka jingtohkit kaba bniah bad la bishar thik pa thik ïa ki sakhi sabut bad ïa ka jingkren ruh la ai hakhmat ka Kashari,” la pyntip u SP.
“Ka jingtohkit kaba bniah ka lap ba ka jingkynnoh kam shym la jia satia katkum ba la kdew ha ka ejahar,” la ïathuh shuh shuh u SP.
Da kaba bud ryntih ïa ka rukom treikam jong ka ain, yn aiti ïa ka kaiphod ba khatduh halor kane ka kam hakhmat ka Kashari.
