Shillong, Nailar, 20: U Acting Lyngdoh jong ka Kur Paliar Mawkyrda Lai kpoh (Lai Kynthei) u Bah Phaiborlin Paliar ha ka sngi Baar ula sei ban pyni sabut da ka Dulir kaba la shon muhor ha u snem 1878 da u (Late) Borsing Syiem, uba dei u Syiem jong ka Hima Langrin ban pynshisha ïa ka jinglong trai jong ka Kur Paliar Mawkyrda Lai kpoh (Lai Kynthei) ïa ka Ri Lyngdoh Kur Paliar Mawkyrda Kpohbah.
Haba pynshisha ïa ka jinglong trai jong ka Kur ïa ka Ri Lyngdoh Kur Paliar Mawkyrda Kpohbah halor ka jingkynnoh jong u Bah Breswell Mawpyrdoi ha kawei ka YouTube Channel shimet ba la ai kyrteng Mei Ri Lum, u Bah Phaidorlin u la ong, “halor ka jingkynnoh ba ïa ka dulir jong ngi ki Kur Paliar la pynduh pyndam, hynrei ka dulir jong ngi ha u snem 1878 la ai da u (Late) Borsing Syiem, uba dei u Syiem jong ka Hima Langrin ka dang neh haduh mynta.”
“Hangne (ha ka dulir) la thoh shai ba kane ka khyndew kan long ka hok jong phi ki jait Paliar, ki khun kynthei kiba hiar pateng na u Ksan Lang bad u Sngi Lang, kiba kyrteng ka Phonlang, ka Mahlang, ka Iewphanmitlang Paliar Mawkyrda Kpohbah. Ha kane ka dulir la kren shai ba kan long ka hok jong ngi ki Paliar Kpohbah kiba hiar pateng kiba dei ki khun pyrsa trai jong u Ksanlang bad u Sngilang kiba pynïoh ïa ka khyndew ha ka por ba don ka jingïaleh thma pyrshah ïa u Syiem Myrïaw. Lada u Bah Bresswell bad ka kynhun jong u lada u don ïa ka dulir, kan bha ba ngin ïa pynksan ha Iingbishar bad ngin leh ïa kaei kaei ha kaba shai da ka lynti kaba dei,” la ong u Bah Phaiborlin bad bynrap, “ngi long kiba kloi ban ïa pyni ïa ka hok jong ngi. Ka dulir kan ïai neh kaba dei jong ngi ki Kpohbah, ki dei shi para kynthei, khlem ong lai jait lai kynja.”
Ha kajuh ka por u la dawa ruh ïa u YouTuber uba dei u trai jong ka Mei Ri lum YouTube Channel ban panmap hapoh shitaiew lyngba ki lad pathai khubor halor ka jingkynoh ba u Bah Phaiborlin Paliar u la phah khang khyrdep ïa ka iew.
“Lada u trai jong ka Mei Ri lum YouTube Channel um lah ban panmap halor ka jingkynnoh un shah mudui da ka ejahar sha ki bor jong ka aiñ,” la maham u Bah Phaiborlin.
Shuh shuh u la kam ruh ba ka Paliar Mawpyrdoi bad ka Paliar Sangleiñ kim donhok hi ruh wat ban long Lyngdoh lane Acting Lyngdoh hynrei ki shu knieh jubor ha ka por jong u Lyngdoh uba 12 jong ka kur u Bah Hinriris Lyngdoh da kaba phah resaiñ noh namarba u la tymmen da kaba ai pisa T.1800 bad ot syiar. Naduh kane ka por ba la phah resaiñ ïa u Bah Hinriris Lyngdoh ka la mih ka jingkulmar kumne haduh mynta mynta hapoh ka khyndew Ri Lyngdoh.
“Dei tang ka jingkwah rhah jong ki ïa ka bym dei, hynrei ynda la ïaid ka jingsynshar jong ngi ka Kpohbah naduh u Lyngdoh uba nyngkong haduh u Lyngdoh uba khatar kam don satia ka jingïakajia hynrei ka dei ka jingkwah rhah jong ka jait Mawpyrdoi bad Sangleiñ kaba wanrah ïa ka jingkulmar bad ka jinghuri hura hapoh ka khyndew Ri Lyngdoh,” la kynnoh shuh shuh u Bah Phaiborlin.
Halor ka jingmynjur jong u snem 1941 bad 1942, u Bah Phaiborlin u la ong, “ngi la lap bad ngi la tip ïa ki khana ba paka bad ka jait Sangleiñ bad Mawpyrdoi ki pan na ka Kpohbah ïa ka jinglong Lyngdoh hynrei ha ka por jong u Saring bad u Lyngngat ki la ong ba ka kpoh jong ngi kam donhok ban long Lyngdoh hynrei dei tang ka kur Paliar kaba don hok ban long Lyngdoh. Ki jait Mawpyrdoi bad ki Sangleiñ kim don ïa ka “jingmynjur” hynrei ki dang pan na ka ophis u Syiem ha ka 19 tarik, Nailar, 2013.” “Lada u Bah Breswell u don, un wanrah da ka Orginal Agreement jong u snem 1941-1942 ba la mynjur da ki Kur,” ong shuh shuh u Bah Phaiborlin.
Halor ka jingkynnoh jong u Bah Breswell ba u Bah Phaiborlin u dang shu shong shnong dang shi snem ha Nongdiloiñ, u Bah Phaiborlin u la pynshisha hakhmat ki lad pathai khubor ïa ka EPIC, ka Aadhaar Card ba u dei u nongshong shnong ka Nongdiloiñ.
