Shillong, Lber, 27: Ar ngut ki briew ki la shah rai pynrem da kaba shah set along hapoh ka Protection of Children from Sexual Offences (POCSO) Act.
Ha ka rai ba la pynmih ha ka 18 tarik mynta u bnai ka Kashari jong ka Special Judge (POCSO) Shillong Swapna G Momin ka la rai pynrem ïa u nongshah kynnoh u Maitshaphrang Kharmawlong, ha kaba shem ba u donkti bad la rai pynrem ïa u, “na ka bynta ka kam runar ba lah ban pynshitom hapoh ka Section 6 jong ka POCSO Act; ka jingshah set phatok kaba jrong haduh 20 snem kynthih bad ban siew ïa ka kuna kaba T.10,000 bad lada ym lah ban siew ïa ka kuna, un hap ban bteng ïa ka jingshah set along sa ar bnai (bad) na ka bynta ka jingleh kam bymman kaba lah ban shah pynshitom hapoh ka Section 506 IPC: ka jingshah set phatok kaba lai snem bad ban siew ïa ka kuna kaba T. 5,000 hajar bad lada ym lah ban siew ïa ka kuna un hap ban shong along sa shi bnai.”
Ïa ka case la rejistar ha Rynjah Police Station bad ïa ka jingtohkit la bynshet ha u Inspector Raymond Kurkalang jong ka District Executive Force (DEF) bad mynta u la shah thung kum u Officer In-Charge ha Mawngap Police Station.
Ha ka jingpynmih ïa ka rai ha kane kajuh ka sngi, ka Kashari ka la rai pynrem ïa u Demonstar Kharbani, ha kaba la lap ba u donkti bad un ngat ha ka jingshah pynshitom, “ban shong along na ka bynta lai snem bad ban siew ïa ka kuna kaba T. 3,000 hajar bad lada ym lah ban siew ïa ka kuna un hap ban bteng ïa ka jingshong along sa shi bnai kum jingpynshitom hapoh ka Section 8 jong ka POCSO Act.”
Ïa ka case ba la rejistar ha Rynjah Police Station la bynshet ban tohkit da ka Women Police/Inspector Lily D. Sangma jong ka DEF bad mynta ka trei kum ka 2nd O/C jong ka Sadar Police Station.
