Carmel Lyngdoh
Shillong, Jymmang, 22: Ka kam rep ha jylla la donkam ba ki paidbah ban nang kyntiew lyngba ki khun ki kti bad ka por ka ladei ban shim kum ka kam kaba kamai jakpoh ha kane ka juk kyrduh kam.
Ka Kong Magrisha Kharkongor kaba don 11 ngut ki khun ka nongrep ha ka shnong Mylliem Mawpynthih, East Khasi Hill ryngkat bad u kurim jong ka ki dei kiba ju im da kam rep jhur kiba bun jait ba ki mar rep.
Kane ka longkmie ka dei ka nongrep kaba khlaiñ bha ban rep bun jait ki jhur hapdeng ki jhur khasi ba ju rep paidbah bha ha Jylla Meghalaya mynta ha ki lai snem ba la leit ka la pyrshang ban rep ïa u Phul jyrngam uba la tip kum u “Broccoli”. Ïa ki mar rep ba ka thung kam ju ai dawai satia bad ka pyndonkam tang da ka sboh eit masi ne sboh eit sniang.
Kumba ka long mynta, ha Meghalaya dang duna bha ki nongrep kiba rep ïa u phul jyrngam.
Ka longiing jong ka kong Magrisha kaba la pyrshang ban rep ïa u phul jyrngam ka shem ka long ka jingmyntoi bad u mih kynrei bha kumta ka la pynroi bad pynïar ïa ka kam rep jhur bad ki khun ki ïarap lang ryngkat ka jingbuh ki nongtrei ban puh ban daiñ.
Ka kong Magrisha ka ïathuh ha ka jingim kum ka nongrep naduh ba la hikai ki kmie ki kpa ka la im bad pynleit jingim tang ïa ka kam rep namarba ka sngewthuh ba ka long kaba donkam tam ïa u briew ban im ba un ïohbam.
Haba bynrap ka Kong Magrisha ka ong ba ka jingrep jong ka dei namarba ka ïohi ba ka jingbylla sha Iewduh ban die jhur kam don jingïohnong namar ka jingshah khñiot beiñ ha ka dor bad ka jingbym biang bha ka dor ka mur kumta ka la sdang ban duriap da ka rep na ka bynta ban kyrshan ïa ki khun ban leit skul.
Ka la ïathuh watla ka don ki khun ruh kam ju shongthait ka hikai lem ïa ki khun ban tip ïa ka rep namar ban ïoh bam.
Hynrei ka jingkwah jong ka kong Magrisha ka long ban ïoh ïa ka lum rep lajong namarba ïa mynta ka shu wai ïa u lum rep jong ki briew.
Mynta kane ka longkmie ka dei ka briew kaba trei minot bha dang step phyrngab ka la poi sha lum bad la ka khoh u star u mohkhiew ban thung ban tep. Ha ka por shiteng sngi ka khreh ka khrum ban kit ki jhur ban leit die sha iew Jail Road manla ka sngi.
Ka ïathuh ba ha jingrep jong ka iing ka sem kim pat ïoh symbai na ki bor Sorkar hynrei ki shu thied beit na iew haduh mynta.
Mynta kane ka longiing ka la phaikhmat ban biang ban bit ka rep ka riang bad ka iew ka hat ryngkat ka dor ka mur.
Ka kong Magrisha ka la ai mynsiem ïa ki samla pule ban shim ba ka kam rep ka dei kaba kordor ban ïa ka kam Sorkar. “Ka kam rep ka dei ka kam ba kordor tam bad ba khrawtam ban nym lah ban nujor ïa kiwei kam, tangba ngi dei ban long kiba smat bad kiba aiti lut ha ka kam,” la ai mynsiem ka kong Magrisha.
