Shillong, Risaw, 23: Ka Synjuk ki Khlieh Nongsynshar Shnong, Mawsynram C&RD Block ha ka sngi Palei ka la pynsngew ha u Symbud Myntri Rangbah ka jylla uba khmih ïa ka tnat PWD (Roads) Bah Prestone Tynsong halor ka jingsniew shaba palat ka surok naduh Weiloi shaduh Maheshkhola.
U MLA ka Mawsynram Constituency u Bah Olan Sing Suin ha ka jingïakren bad ki lad pathai khubor u la ong, “ka surok naduh Weiloi haduh Phlangwanbro yn sa shna kum ka Intermediate Road ïa kaba yn bei pisa da ka World Bank. Kumba ka long mynta ka jingshna ïa ka surok Intermediate Road ka dang long tang na Mawphlang haduh Weiloi. Kaba sah mynta ka long na Weiloi sha Phlangwanbroi. Kane ka dang dei tang ka Phase-I ba la bei pisa da ka World Bank.”
“Dang ha kine ki khyndiat taiew, ladep aiti ïa ki kot ki sla jong ka Environmental Impact Assessment, ïa ka Detailed Project Report (DPR) bad kiwei kiwei ki kot ki sla ba donkam. Katkum ka jingïathuh u Symbud Myntri Rangbah ïa kane ka kam yn sa khot tender la kumno kumno ha u bnai Naiwieng ne Nohprah,” la ïathuh u Bah Suin.
U la ong ba kane ka Intermediate Road na Weiloi sha Phlangwanbroi ka dei kaba jrong 25 kilomitar mitar.
Katba ïa ka surok kaba 47 kilomitar na Phlangwanbroi shaduh Maheshkhola, Ranikor u la ong ba kane ka kam mynta ka dang sahkut ha ka miej jong u Chief Engineer bad ïa ka jingmang pisa bad ïa ka DPR ruh ym pat phah.
“Katkum ka jingïathuh jong u Symbud Myntri Rangbah shen yn sa phah noh bad ka jingmang pisa ka long kumba T. 250 klur tam eiei lait noh ka jingkieng ha ka shnong Umpung. Ngi khmihlynti ba ha u snem thymmai yn sa ïoh ban mang pisa noh, khnang ba ka surok naduh Shillong, Mawsynram shaduh Ranikor yn pyndep pura,” la pyntip u Bah Suiñ.
U Chairman jong ka Synjuk ki Khlieh Nongsynshar Shnong, Mawsynram C&RD Block u Bah Hiamdor Rapsang haba bynrap halor kane, u la kyntu ïa ka tnat PWD (Roads) bad ïa ki bor synshar district ban khang ïa ki trok kiba kit palat pud ban ïaid lyngba ki jingkieng kiba pynïasoh ïa ka surok Shillong-Ranikor kiba la rim bha.
