Shillong, Jymmang, 3: Kum shi bynta jong ka Poshan Pakhwada 2025 kaba long ha ka ri baroh kawei, ka Central Bureau of Communication (CBC), Shillong, ka la pynlong ar tylli ki prokram ai jingtip ha ka sngi Thohdieng, kata ha ka shnong Rongmesek (Pahamingding) bad ka shnong Pahambirlum kiba hap ha Ri Bhoi. Ki jingïalang ki la sakhi ïa ka jingïashim bynta ba shit rhem jong ki paidbah bad ki la pynpaw ïa ka jingdonkam kaba kongsan ban pynïasoh ïa ka jingtip tynrai shaphang ka jingbam bad ka saian bad teknoloji ba mynta shaphang ka jingbam ban kyntiew ïa ka koit ka khiah bad ka bha ka miat jong ki kynthei, ki khynnah, bad ki samla.
Ka jingthmu ba kongsan jong ka Poshan Pakhwada 2025 ka dei ka 1,000 sngi ba nyngkong jong ka jingim—naduh ba dang pun haduh ka sngi kha kaba ar jong ki khynnah—ba la ithuh kum ka por kaba kongsan ban pynthikna ïa ka koit ka khiah ha ka jingim lyngba ka bam kaba tei met bad jingsumar kaba biang.
Ia ka jingialang ha baroh ar tylli ki jaka la pyniaid da ka Kong O. Sumer na ka tnad ka Koit ka Khiah, kaba la ai ka jingkren kaba bniah halor ka jingkordor jong ka rukom bam tynrai jong ki Khasi bad ka rukom shet jingbam. Ka la pynpaw ia ka jingdonkam ban sdang ia ka sngi da ki jingbam kiba lah ban ioh ha ka thain, kiba khlain ha ka jingtei met kum u riewhadem, u phan dieng, u phan saw, ka shriew, kiba la shet ha ka rukom tynrai ban pynneh pynsah ia ka jingtei met jong ki bad ban tei ia ka bor met ban ialeh pyrshah ia ki jingpang.
Ka la pynshlur ban kynthup ia ki jhur bapher bapher, ki jhur kum u muli khleh bad jhur khleh, bad ka jingpyndonkam ia ki kynbat kum u pudina bad dhania. Ka la ai jingmut ban kynthup lang ia ki soh kiba ioh ha ki aiom bapher bapher ha ka rukom bam bad ka la ban jur ia ka jingdonkam ban ai dud, ai bam ia ki khunlung, bad ka jingai kiwei kiwei ki jait jingbam ha ka por ba dang rit.
Ka la kren ruh shaphang ka jingdonkam ki mar bam jong ki kmie kiba armet bad kiba ai buin, ki khynnah kiba dang san, bad ki samla, da kaba kren kyrpang halor ka jingïakhun pyrshah ïa ka jingduna snam, kaba ktah ïa ki briew kiba bun. Ka la ai ïa ki buit ha kaba iadei bad ki rukom bam kiba lah ban ai jingiada na ka jingpang shini, ka jingpang kyndeh, ka jingkhuslai, bad kiwei kiwei ki jingpang kiba ïadei bad ka rukom im, da kaba pynpaw ïa ka bynta jong ka jingbam, ka jingpynbiang um ia ka met, bad ka jingryntih ka rukom bam ban kyntiew ïa ka koit ka khiah.
Kum shi bynta jong ka sienjam Suposhit Gram Panchayat, ka Private Registered Troupe (PRT) na ka CBC Guwahati ka la ai ia ka skit. Ka skit, kaba la pyniasoh lang ia ka jinglong dynda, ka jingiathuhkhana tynrai, bad ka jinghikai, ka la wanrah ia ka jingphaikhmat sha ka jingdonkam ia ka bam kaba tei met ia ki longkmie bad ki khynnah kynthei kiba dang samla bad ka la iathuh shaphang ki jingma kiba lah ban mih na ka jingbam palat ia ki jingbam kai.
U Bah Bithius Taro, Rangbah Shnong ka Rongmesek, u la ïaroh ïa kane ka sienjam bad kyntu ruh ïa ki paidbah ba kin pynneh pynsah bad pyntreikam ïa ka jingstad kaba iadei bad ka rukom bam tynrai. U la pynpaw ia ka bynta kaba kongsan jong ka jingbun ki jait jingbam ha ka thain bad u la kyntu ban kyntiew ia ka jingkitkhlieh jong ki paidbah ha kaba kyrshan ia ki jingthmu ban ioh ia ka bam kaba tei ia ka met bad ki sienjam na ka bynta ka koit ka khiah. U la ïaroh ruh ïa ka jingtrei shitom jong ki Nongtrei Anganwadi (AWW) ban wanrah ïa ka jingpynsngewthuh shaphang ka jingbam ba tei met sha ka shnong ka thaw. U Rangbah Shnong bad u Vice President jong ka Pahambirlung ruh ki la ia donlang ha kane ka jingialang kaba ar.
Ka kong Wanrishisha Pde, Lady Supervisor jong ka ICDS, Umling Block, ka la ban jur halor ka jingdonkam jong ka jingai bam kaba tei met ïa ki khynnah rit bad ka jingdonkam ban buddien man ka por ïa ka jingheh jingsan jong ki khynnah. Ka la pynshlur ïa ki nongïoh jingmyntoi ban pyndonkam ïa ka jingkyrshan kaba don hapoh ka ‘1,000 – Day Protection Programme’, kaba long shi bynta jong ka Integrated Child Development Scheme (ICDS). Ka la kren ruh halor ka jingpyndonkam hok ia ki lad ban buddien ia ki nongioh jingmyntoi, ka jingpeit ia ka jingduna bam lyngba ka lad CMAM, bad ka jingkyntiew ia ka rukom im kaba koit ba khiah.
Ka kong Dianghun Lyngdoh, ka ICDS Supervisor, ka la ban jur ia ka jingdonkam jong ka jingiatreilang bad ki paidbah lyngba ka jingleit jngoh ia ki iing ki sem, ka jingiakren ha ki kynhun bapher bapher, bad ka jinghikai kaba iashim bynta lang. Ka la ong ba dei ban pyndonkam ia ki jingiathuhkhana pateng bad ka riti dustur kum ki lad kiba seisoh ha ka kolshor ban pynsaphriang ia ka jingtip shaphang ka koit ka khiah bad ka rukom bam kaba tei ia ka met.
Ha ka jingkren pynkut jong u, u Assistant Director, CBC Shillong u Gopajit Das u la ïaroh ïa ka jingshimkhia jong ki nongtrei ICDS, khamtam eh ki AWW, namar ka jingtrei shitom jong ki ban pynthikna ba ka jingshakri ha kaba iadei bad ka rukom bam kaba tei ia ka met ka poi sha manla ki thliew ïing. U la kyntu ban don ka jingiatreilang kaba neh hapdeng ki dkhot jong ka imlang sahlang, ki nongpyniaid ia ki jingshakri, bad ki nongialam shnong ban pynurlong pura ia ki jingthmu jong ka Poshan Abhiyaan.
Ban kyntiew ia ka jingioh jinghikai, la pynlong ia ki jingiakop dro dur na ka bynta ki khynnah skul ha baroh ar tylli ki prokram, da kaba pynshlur ia ki ban pynpaw ia ka phang jong ka rukom bam kaba tei met bad ka jingbam kaba biang lyngba ka jingdro. Ha kajuh ka por, la pynlong ia ki jingiakop quiz hapdeng ki longkmie, da kaba peit bniah ia ki phang kum ka jingsumar ia ki khun, ki jingbam ba tei met kiba don ha ka thain, ka jingai buin, bad ka jingkhuid jingsuba. Ka quiz ka la long kaba sngewtynnad bad kaba ai jinghikai ban kyntiew ia ka jingsngewthuh jong ki kmie namar ki don ka bynta kaba khraw ha ka jingpynthikna ia ka jingioh ia ka bam kaba tei met ha ka longiing. La sam ia ki khusnam bad ki syrnot ai khublei haba kut ki prokram.
La pynkut ia ki prokram da ka jingkular jong ki paidbah ban pdiang ia ki rukom bam kiba tei met, kiba ioh na ka thain, bad ki rukom bam tynrai, bad ban long ki nongmihkhmat na ka bynta ka koit ka khiah bad ka bha ka miat hapoh ki shnong jong ki.
