Shillong, Lber, 15: Ka Khasi National Academy (KNA) ha ka sngi Saitjaiñ ka la hiar sha ka Mawthungmarwei ban pynsngewthuh ïa ki paidbah nongshong shnong kumno ban sdang noh da ki buit ba kham pher khnang ban kyntiew ïa ki lad kamai kajih hapdeng ki nongshong shnong.
Ha kane ka Community Building Program 2025 ba la ïashim bynta lang da u Sordar Shnong Bah Witstar Nongphud la plie ruh ïa ka Mawthungmarwei Village Strategic Bitcoin Reserve Unit bad ki jingbatai kiba bniah da u Founder President jong ka Khasi National Academy u Bah Charlie TL Mawlieh.
Haba kren ha kane ka sngi, u Bah Charlie u la ong, , “ngi paidbah ka ri Khasi mynta ngi dei kiba lah ban im mar shi lak hapoh shi snem jong ki san snem. Nangta mar shi lak shi bnai hapoh ar snem jong ki san snem. Nangta mar shi lak shitaiew hapoh lai snem jong ki san snem. Nangta mar shi lak shi sngi hapoh saw snem jong ki san snem bad mar shi lak tam shi kynta manla ki kynta shi rta jingim shwa ban kut u snem 2031 da ki kam ba ngin sdang noh naduh mynta ka sngi.”
“Kiei ki kam ba ngi dei ban leh ban ïoh ïa ka Economic Freedom ha ki shnong ba ngi don? Ngi donkam ban leh noh da ki kam ba kham pher bad da kine ki kam ngi dei ban lah ban kyntiew ïa ka shnong ba kan kiew shaphrang. Ngi hap ban lah ban pyndep ïa ki jingtei ïa baroh kine ki jingdonkam kloi lan katba lah. Ngi hap lah ban shna noh ïa ki ing skul, ki kolej, ki skulbah bad kiwei kiwei ki shlem ai jinghikai kiba khlaiñ bad kiba skhem bha. Ki jinghikai ïa baroh ki jingtip ba donkam ruh ngi dei ban sdang noh naduh mynta ka sngi lyngba ka World Crypto University. Ngi hap ban shna ïa ki Dorbar Hall, ki Community Hall bad ki Youth Center kiba lah ban ai jingmyntoi ïa ka shnong,” u la ong.
“Ngi hap ban shna ïa ki surok lai syrtap, kata ki Under Ground Road, ki Four Lane Road bad ki Air Way ha suiñ. Kine ki surok ki dei ban lah ban pyn biang bad pynsuk ïa ka ïaid ka ieng bad ïa ki kam khaii pateng jong ki paidbah shnong. Ki Under Ground Road kin dei ruh ki Bomb Shelter ban ïada la da khie thma. Ngi dei ban lah ban pynmih ïa baroh ki jait marbam na la shnong. Ngi dei ban sdang noh ïa ki Microgreens, Aeroponics, AquaPonics, Hydroponics, Vertical Farming, Tower Farming, Organic Farming bad Rooftop Farming. Ngi hap lah ban pynmih ïa ka Foods Surplus kat ban suplai marbam ha kiwei de ki shnong bad ki Ri da ka jing pyndonkam pura ïa ki jing stad Science da ki Bio and Rural Technology,” la ai jingmut u Bah Charlie.
“Ngi dei ban lah ban seng noh ïa ki karkhana kiba lah ban pynmih ïa baroh ki jait mar katba ngi donkam. Ngi dei ban lah ban thied ruh ïa ki jaka ha bun ki bynta ban seng ïa ki kam ban pynkhlaiñ ïa ki kam khaii pateng. Ngi hap ban seng noh mynta ïa ka Village Crypto Reserve Unit bad ka Village Crypto Farming Project ha kaba da kine ki kam ngi dei ban lah ban pyn mih 120 tylli ki Bitcoin na ka bynta ka pisa shnong mar 100 tylli ki Bitcoin da ki CBOs jong ka shnong bad mar 12+1 tylli ki Bitcoin da baroh ki paidbah jong ka shnong. Nalor ki Bitcoin ngi hap lah ban pynmih ruh ïa bun bah kiwei de ki Crypto Assets da ka jingpyntreikam pura ïa ka Village Crypto Farming Project,” ong pynshai u Bah Charlie.
“Ban pyntikna ïa ki jingjop kumba la lamphang naduh mynta ngi dei ban lah ban pyn long ïa ki Inter Village Community Building Program ha kaba kawei ka shnong kan ïarap ban ai jinghikai ïa kawei pat ka shnong da ki items/tools ba la buh ryntih katkum ka jingthmu. Ki nonghikai jong ki skul kin dei ki nongïalam ba khlaiñ ban hikai. Ki Samla kin dei kiba hakhmat eh ban pynstet ïa ki kam. Ki jingtrei ban pyntbit yn hap ban ïashim bynta lang da baroh ki paidbah jong ka shnong,” la ïai ban u Bah Charlie.
“Dei ruh ban lah bad ban shna noh da ki Family Towers ha manla ki shnong. Kine ki Family Tower ki mut haba ka kmie bad u kpa ki la pynroi ïa ka Bloodline ne ka iing ka sem jong ki, ki dei ban shna shwa tang ka wei ka iing kaba bun mala ha ka ba ki khun nyngkong kin ïoh bynta ïa ka mala banyngkong bad kumta kan dei ïa ki khun khadduh ba kin ïoh bynta ïa ka mala ba hajrong tam. Kane ka polisi treikam kan dei ruh ka thong ban ai jaka ïa ka jingjyrngam jong ka mariang bad khnang ban ïoh ïa ka lyer ka bakhuid ha shnong,” u la ong.
“Donkam ban pynmih bunbah ki Wind Energy, Solar Energy bad Electricity na ka bynta ban ai jingshai bad jingshngaiñ ïa la ka shnong bad ki shnong ba marjan. Mynta ban pynlong kam ïa kitei ki kam da baroh ngin tur shaphrang ban nang sdang pyntrei kam noh ïa kine ki rukom trei kam da kine ki Crypto Project katkum kine ki thong treikam ba ngin sa ai,” la pyntip u Bah Charlie.
