Shillong, Shillong, 05: Ka Joint Action Committee (JAC), kaba kynthup ïa ka Jaiñtia Hills Truck Owners Association (JHTOA) bad ka East Jaiñtia Hills Truck Owner & Transporter Association (EJHTOTA) ka la kyntu ïa ka Sorkar Jylla ba kan pynthikna ïa ka jingshngaiñ jong ki trok kiba kit dewbilat bad kiba kit ïa u clinker kiba ïaid lyngba ka surok National Highway-6
U kyrwoh ba la phah da u Chairman ka JAC u Bah Biangshwa Shylla ha ka sngi Balang ki la ïakren sani bha ïa ka jinglong jingman halor ka jingbym ïohlad shuh ki trok kit dewbilat bad clinker ban bteng ïa ka kit ka bah la jan ar taiew duna na ka jingïakhih ba khlem pud sngi jong ka Meghalaya Commercial Truck Owner and Driver Association (MCTO&DA).
Ka JAC ka la shim ïa ka rai ban phah beit ïa ki trok ban bteng ïa ka kit ka bah naduh mynta ka sngi bad ruh ban dawa ïa ka Sorkar Meghalaya ba ka dei ban pynthikna ba ym dei ban don kano kano ka jingpynthut ïa ki trok ha shilynter ka surok NH-6.
“Ka JAC kam ïadon bynta eiei ruh em ha ka jingïakhih jong ka MCTODA, hynrei kaba lyngngoh ka long ba ki trok kit dewbilat bad clinker jong ka ruh ki la shah bat lang bad kiwei pat ki trok. Ka jingbym ïoh shuh jong ki trok jong ka mynta lah shi taiew tam ei ei ban bteng ïa ka kamai kajih tang na ka daw ka jingshah bat ha ka jingïakhih jong ka MCTODA ha ki bynta jong ka surok NH-6 ka la wanrah ïa ka jingduhnong kaba khraw haduh katta ïa ki trai trok bad ki nongñiah trok kiba don hapoh jong ka lama jong ka JAC,” la ong u kyrwoh.’
U Bah Shylla u la ong ba ka JAC ka la kyrpad ïa ki nongïalam jong ka MCTODA shwa ba kan pynlong ïa ka jingïakhih ban ym bat ïa ki trok jong ka JAC hynrei ka MCTODA kam shym la burom ïa ka jingkyrpad jong ka JAC.
“Na kata ka daw ka JAC, ka la hap ban shim noh da kane ka rai bad kumba ka long mynta, ki bun bha ki trok jong ka JAC kiba la shah bat ha kane ka jingïakhih jong ka MCTODA tad haduh mynta ruh ha ryngkat ka jingkit kaba khia. Lada jia ba ki mar ba don hapoh jong ki trok ba la shah bat, kin sniew noh lane shah tuh, lane shah leh kam sniew, mano ban bah khlieh ïa kane? Ngi kwah ïa ka Sorkar ba kan pynshai ïa kane,” la dawa ka JAC.
U Chairman ka JAC, uba dei ruh u President jong ka JHTOA, u la ong, naduh ba la seng ïa ka JHTOA ha u snem, 1982, ka seng kam ju thiah sngi, ka la trei shibun ki kam na ka bynta ka bha ka miat jong ki trai trok kiba don ha rilum Jaiñtia. Ha u snem 2020, ka JAC ha kito kipor kaba kynthup ïa ka JHTOA, MTU, AJCCTA, AJHTA, bad kiwei kiwei da ka jingkyrshan lang jong ki sengbhalang ka rilum Khasi-Jaiñtia ban pynkiew noh ïa ka dor kit dewbilat bad clinker, ka Sorkar Jylla ruh katkum ka jingpynbna ha ka 13 tarik, Kyllalyngkot, 2020, ka la buh dor T. 9 shi metric ton na ka bynta shi kilometer. Hynrei, na ka jingmih kiwei pat ki daw, lyngba ka jingpynbna kaba la pynmih ha ka 25 tarik, Nailur, 2020, ka Sorkar Jylla ka la pynkylla biang ïa ka dor, da kaba buh noh T. 7 bad T. 11 shi metric ton na ka bynta shi kilometer.
“Kumta, kumba ka long mynta, ki trok ki ïaid ha ka dor ba la buh da ka Sorkar Jylla tangba ha ka dor T. 7 shi metric ton na ka bynta shi kilometer,” la ong shuh shuh ka JAC.
U Secretary ka JAC, Bah Kyrshan Dkhar, uba dei u President jong ka EJHTOTA, u la ong naduh ba la seng ïa ka kynhun ha snem, 2023, kam shym la shong klikti hynrei ka la trei shibun ki kam na ka bynta ka bha ka miat jong ki trai trok bad ki nongshalan mar jong ka East Jaiñtia Hills District.
“Ka EJHTOTA ka la don shibun ki jingïakren bad jingïapynbeit kam bapher bapher la ka dei bad ka Sorkar Jylla ne bad ka JHCMA, kiba dei na ka bynta ka bha ka miat jong ki trai trok bad nongshalan mar ka East Jaiñtia Hills,” ula ong.
“Ha kaba ïadei bad ka dor ba la buh da ka Sorkar Jylla ka JAC, mynta ruh, ka khlem shong kli kti, hynrei ka la dawa na ka Sorkar Jylla bad ïa ka JHCMA ban pynkiew ïa ka dor kit bad ïa ka quota jong ki trok na Jaiñtia Hills, khnang ban ïa im lang. Halor kane, dang shen, ka JAC, ka la buddien ïa ka mat jingdawa na ka sorkar jylla bad na ka JHCMA bad ha ka 12 tarik, Nailar, 2025, ka la ai sa kawei ka dorkhas sha ka Sorkar Jylla bad sha ka JHMCA bad la pynbud biang sa ka dorkhas na ka EJHTOTA ha ka 4 tarik, Nailur, 2025. Halor kane ka Sorkar Jylla ruh ka la kular ba shen kan sa lum ïa ka jingïalang ïa baroh ki kynhun ban ïa pyrkhat ïa ka jingdawa jong ka JAC hynrei ka jingïalang ka kham slem khyndiat tang na ka daw jong ka shuti puja. Ka JAC ka khmihlynti ba shen ka Sorkar Jylla kan sa khot ïa ka jingïalang na ka bynta ban ïakren halor ka ka mat jingdawa,” la bynrap u Bah Dkhar.
Haba kynthoh halor ka jingbym ïoh shuh jong ki trok ka JAC ban ïaid kumba ju long, u Bah Kyrshan Dkhar u la ong, “ka la pynkthang ïa ki dkhot jong ka JAC namarba ki trai trok ki siew ïa ki khajna bad kiwei de ki jingsiew bapher bapher sha ka Sorkar, hynrei kaba pynlyngngoh ka long ba balei pat ba ka Sorkar kam lah ban pynthikna ïa ka jingshngaiñ jong ki trok kiba ïaid lyngba ka surokbah NH-6?
“Ngi thied trok na ka bynta ban kamai jakpoh ym ban shu pynieng durmot ha iing lane ha surok lane lynti synkieng ban ïoh peit kai ki briew. Na kata ka daw, ngi kwah ban pyntip sha ka Sorkar Jylla ba naduh mynta ka sngi, ki trok jong ka JAC, kin mih kumba ju long manla ka por bad ngi dawa jur na ka sorkar jylla ba ka dei pat ban pynthikna da kaba shim ïa ki lad ki lynti kiba donkam katkum ka bor jong ka khnang ba ka ïaid ka ieng jong ki trok ka JAC lyngba ka surokbah NH-6 ka dei ban long kaba thikna, kaba ïaid beit bad kaba shngaiñ hynrei lym kumta ka JAC kan ym banse ban shim da kawei pat ka lynti kaba tyngeh,” la bynrap u kyrwoh.
