Shillong, Rymphang, 11: Ka la don ka jingpyrshang ban pynthut ïa ki jingïalang na ka bynta ka elekshon sha ka Jaiñtia Hills Autonomous District Council (JHADC) ha ki ar tylli ki shnong kiba hap ha ka thaiñ Block-I ha ka sngi Baar da ki jaidbynriew Karbi kiba kam ba ka thaiñ Block-I ka dei kaba dang hap hapoh u pud u sam jong ka West Karbi Anglong District jong ka jylla Assam.
Ha ka jingjia ba nyngkong kaba la jia ha ka por mynstep ha ka shnong Shnongthymme ha Block-I ha ka thaiñ Mowluber, Mowjem kaba hap hapoh ka Barato Mukroh Konstitwensi ha ka por ba la pynlong long jingïalang da ka kyrtong jong ka seng Congress ka Kong Banikas Laban ki la don kumba 4-5 ngut ki jaidbynriew Karbi kiba la wan poi ha ka jingïalang bad kiba la sdang ban ring video bad hadien katto katne por ki nongbud jong ka Kong Banikas Laban ki la ïoh pyntip noh da la telephone sha ki Pulit Assam ha kaba la bthah ban ym pynlong ïa ka jingïalang ïalap elekshon ha West Karbi Anglong District. Mar kumta hi ka Kong Banikas ka la rai ban pynlong noh ïa ka jingïalang tang katto katne por khnang ban lait na kino kino ki jingjia bym sngewtynnat.
Ha kawei pat ka jingjia shi kynhun ki jaidbynriew Karbi ki la wan poi ha ka shnong Mokoiram ha ka por ba la pynlong ïa ka jingïalang ïalap elekshon da u kyrtong jong ka United Democratic Party jong ka Mynsngat Khanduli Constituency u bah Damian S. War.
Ki jaidbynriew Karbi kiba la wan poi ha ka jaka ba la pynlong jingïalang ki la wohnia halor ka jingpynlong ïa ka jingïalang da kaba kam ba ka Mokoilam ka dei ka shnong ba dang hap hapoh ka West Karbi Anglong District hynrei na ka liang ki nongkyrshan u bah Damien ki la kam beit ba ka shnong Mokoilam ka dei ka shnong kaba dang hap hapoh ka jylla Meghalaya bad ki la bteng beit ïa ka jingïalang khlem da pyndem hakhmat ki jaidbynriew Karbi.
