Shillong, Jylliew 01: U President jong ka Voice of the People Party (VPP) u Bah Ardent Miller Basaïawmoit ha ka 1 tarik u Jylliew, 2023 u la pynkut noh ia ka jingshah jingit kaba la neh haduh 221 kynta, kata hadien 10 sngi ba u la sdang ia ka jingshah jingit ba khlem pud sngi naduh ka 23 tarik u Jymmang, 2023 ban pynbor ia ka Sorkar Meghalaya Democratic Alliance (MDA) ba la ialam da ka National Peoples Party (NPP) ba kan khmih bniah bad ban bishar bniah ia ka State Reservation Policy, 1972.
Kane ka jingweng noh ia kane ka jingshah jingit ka long hadien ba ka Sorkar ka la phah da ka jingpyntip (Notification) halor ka jingthaw ia ka Expert Committee ka ban bishar thymmai ia ka Reservation Policy hapoh ka Jylla.
Da ki hajar ngut ki paidbah ki la tuid sha ka jaka shah jingit u Bah Ardent ha Parking Lot kaba don markhap bad ka ophis Additional Secretariat, Shillong naduh ka por 2:00 baje nohphai sngi ban sngap ia ka jingpynbna kaba u Bah Ardent u la pynkut noh ia ka jingshah jingit kaba khlem pud sngi hadien ba ka Sorkar MDA ka la mynjur ban thaw da ka Expert Committee.
