Shillong, Jylliew, 30: Ka la mih ka jingïapynibor na ki nongdie madan naduh ka por mynstep haduh ka por janmiet ka Lah Sngi u Blei katba ki nongtrei jong ka Shillong Municipal Board (SMB) ba la synran lang da ki bor Pulit ka Jylla bad ki Pulit CRPF ki dang kyndang ïa ki nongdie madan kiba ju shong die jingdie ha Khyndai Lad bad kurup ruh naphang ïa ki mar ki mata jong ki nongdie madan.
Ka jingkyndang jong ka Shillong Municipal Board (SMB) ïa ki nongdie madan ka long hadien ba ka jingaipor ka la kut noh dang shen bad hadien ba ladep shna ïa ki dukan shong die jingdie jong ki nongdie madan ha ka mala kaba shalor jong ka Meghalaya Urban Development Authority (MUDA) bad ha Parking Lot kaba don mar pyrshah ïa ka State Bank of India (SBI) markhap bad ka Wards Lake, Shillong.
Katba ki nongtrei ka Municipal ki dang tohkit, ki kynthei Khasi ki la mih hakhmat hakhmat ban ïania bad ki Magistate, ki nongtrei ka Municipal bad pynibor ruh da kaba ïakhun pyrshah ruh ïa ki Pulit.
Nalor ba ki nongdie madan ki la pyneh, kawei ka nongdie madan ka la sei kynsan na ka pla khung ïa u sdie ban pyntieng katba ki nongtrei jong ka Municipal ki dang pan ïa ka Laisen.
Kawei pat ka nongdie madan ka la byrngem pyntieng ban kyrshut da u sohmynken beb ïa ki nongtrei ka Municipal lada ki shlan ban kyndang jubor na ka jaka ba la shong die jingdie.
Hynrei ki don pat ki nongdie madan kynthei Khasi kiba kren da ka ktien kaba jem ïa ki nongtrei ka Municipal katba ki dang phah pyni ïa ka laisen shong dukan ba la ai da ka Municipal.
Kane ka jingshah kyndang jong ki nongdie madan ka la pyndkoh ruh ïa ka khaii ka pateng ha iew Khyndai Lad ha kaba la sakhi ba ki don ruh katto katne ki dukan kiba la khang khyrdep.
Katkum ka khubor Sorkar la pyntip ba kane ka jingkyndang ïa ki nongdie madan kan dang bteng haduh ka por 8:00 baje mynmiet ha kane ka sngi.
Ha kane ka sngi, marmar ki nongïalam jong ka seng ki nongdie madan ka Meghalaya and Greater Shillong Progressive Hawkers and Street Vendors Association (MGSPHSVA) ki la phah da ka jingthoh sha u Symbud Myntri Rangbah ka Jylla uba khmih ïa ka tnat Pynroi Sor u Bah Sniawbhalang dhar ba un khmih biang ïa ki shithi ba la ka seng ka la phah sha ka Provisional Town Vending Committee bad sha ka Sorkar.
“Ngi kyntu ïa phi ban pan ïa ki File na ka ophis jong ka Municipal bad ban dawa ba ki dei ban pynshai sha phi ïa baroh ki kam kiba la leh haduh mynta,” ong ki nongïalam ka (MGSPHSVA) ba la soi da ka President ka Kong Biolin Pyrtuh bad ki dkhot ka seng.
“Sngewbha ban peit ïa kane ka shithi kaba ngi la phah mynta ka sngi sha ka PTVC. Ngi la ai ïa ka jingïatreilang ban pynthikna ba ka aiñ 2014 halor ka kam die madan dei ban pyntreikam pura hynrei mynta ka sngi, ki bor ba dei khmih ki la pynibor wat haba ngi ruh ngi long ki dkhot jong ka PTVC bad kum kine ki jingpynibor ngim shym la aibor ha ka PTVC,” ki la ong.
Ka jingjia mynta ka sngi ka dei ka jingpyrshang jubor ban pynslem ïa ka jingtreikam da kaba pyndonkam da ka bor, ban kyndang ïa ki nongdie madan bad ban kurup be-aiñ ïa ki mar ki mata, la pynpaw ka (MGSPHSVA)
“Ngi kyntu ïa phi ban pynsangeh noh mardor ïa kane ka kam bad ba dei ban khot kyrkieh ïa ka jingïalang jong ka PTVC,” la dawa ki nongïalam jong ka (MGSPHSVA).
