Shillong, Jymmang, 16: La lap ba ym don shuh ki trok kiba kit palat pud kiba ïaid na ki 24 tylli ki Weighbridge ha kylleng ka jylla.
Ïa kane la pynpaw da ka Sorkar Jylla ha ka kaiphod ba la aiti sha ka Iingbishar Meghalaya High Court ha ka 8 tarik Jymmang, ha kaba ïadei bad ka PIL ba la ujor da u nongtrei monsngewbha u Tennydard M Marak.
Ka Iingbishar ka la shong bishar ïa kane ka kam ha ka sngi Thohdieng.
U Marak ha ka PIL u la kynnoh ïa ka jingleh bymsuidniew da ki ophisar sorkar ha kaba pynïaid ïa ki 28 tylli ki Weighbridge ha kylleng ka Jylla.
Ka jingujor ka long ba ïa ki kali kit mar kiba kit palat pud la ailad ban ïaid lyngba khlem da thew bniah kat haduh ba ka la pynduhnoh ïa ka jingïohlum khajna jong ka Jylla.
Ha ka hukum, ka Bench kaba kynthup ïa u Chief Justice IP Mukerji bad u Justice W Diengdoh ka la ong, da ka hukum kaba kham mynshwa halor kane ka kam, la bthah ïa ka Jylla ba shah mudui ban pynlong ïa ka jingtohkit kaba bniah halor kane ka kam da kaba jurip ïa ki weighbridges ha ryngkat ka jingdon lang u nongmudui.
“U nongïasaid aiñ uba mihkhmat na ka bynta ka Jylla u la ai ïa ka kaiphod ha ka 8 tarik, Jymmang, 2025 ban pyni ïa ka sienjam ba la leh. Katkum kane ka kaiphod, ïa kane la leh ha ki 24 tylli ki weighbridge. Ym don shuh wat ha kawei na ki, ban lap ïa ka jingïaid jong kano kano ka trok kaba kit palat pud,” la ong ka hukum.
Hynrei u Dr. P. Agarwal, u nongïasaid aiñ jong u nongmudui u la kyntait ïa ka jinglong hok jong ka kaiphod ba la leh bad u kwah ban ujor biang.
“Ïa ka por la ailad biang. Ïa ka jingujor lah ban ai shwa ka 6 tarik, Jylliew, 2025,” la ong ka Bench ha ka hukum jong ka.
