Guwahati, Lber, 06: Ka Sorkar Assam ha ka sngi Balang ka la pyntip hapoh ka Iingdorbar Thawaiñ la jan 83,000 hektar ka jaka kaba dang hap hapoh ka jylla Assam ka la shah klun jaka ha ki saw tylli ki jylla ba marjan.
Haba jubab ïa ka jingkylli ba la wanrah da u MLA ka Congress u Rekibuddin Ahmed, u Myntri ka Sorkar Jylla uba khmih ïa ka tnat Border Protection and Development u Atul Bora u la ong, 82,751.8618 hektar ka jaka kaba don ha ki 17 tylli ki distrik ka jylla Assam ki la shah klun ha ki saw tylli ki jylla ba marjan ba kynthup ïa ka Arunachal Pradesh, Nagaland, Mizoram bad ka Meghalaya.
Katkum ka jingai jingkheiñ da ka Sorkar Assam, ka Nagaland ka la klun jaka 59490.21 hektar, katba ka Arunachal Pradesh ka la klun jaka 16144.0117 hektar, ka Mizoram ka la klun jaka 3675.78 hektar bad ka ka Meghalaya ka la klun jaka 3441.8601 hektar.
U Myntri ka Sorkar Assam u la ong napdeng ki district ka jylla Assam kiba la shah ktah ki long ka Golaghat, Sivasagar, Jorhat, Charaideo, Sonitpur, Biswanath, Lakhimpur, Dhemaji, Tinsukia, Dibrugarh, Goalpara, Cachar, Kamrup, West Karbi Anglong, South Salmara Mankachar, Karimganj (ba la tip mynta kum ka Sribhumi), bad ka Hailakandi.
U Borah u la ong shuh shuh ba ka jingïakren pynbeit pud jong ka Sorkar ka dang ïaid shakhmat bad ki jylla kiba marjan ban ïa pynbeit noh ïa ki jingïakajia pud.
Ka Assam bad ka Meghalaya ka don 12 tylli ki jaka ba ka ïakajia pud ha shilynter ka khappud kaba 884.9 kilomitar bad ka jingïakajia ha ki hynriew tylli ki jaka ladep ïapynbeit bad ka Meghalaya lyngba ka jingïasoi ïa ka Memorandum of Understanding (MoU) ha ka 29 tarik, Lber, 2022 ha kaba la sakhi lang da u Myntri ka tnat Kam Pohing ka ri u Amit Shah.
“Kumjuh ruh, ka Sorkar Assam bad Arunachal Pradesh ka la thw ïa ki 12 tylli ki Regional Committee. Ki Regional Committee jong ki ar tylli ki jylla ki la sorjamin sha khappud bad ïasyllok ruh bad ki trai shnong ban wad ïa ki lad ki lynti na ka bynta ban ïapynbeit ïa u pud u sam. Ha ka 20 tarik, Ïaïong, 2023, la ïasoi ïa ka MoU hapdeng ka jylla Assam bad ka jylla Arunachal Pradesh ha New Delhi ryngkat ka jingsakhi lang jong u Myntri ka tnat Kam Pohing u Amit Shah. 71 tylli na ki 123 tylli ki shnong ladep ïapynbeit da ka jingïasoi ïa ka MoU bad la buh sngi ruh ban shim rai khatduh ha kaba phiah ïa u pud u sam na ka bynta ki shnong kiba dang sah. Ban pynbeit ïa ka jingïakajia ha khapud bad ka Mizoram, ka Sorkar ka la pynlong ïa ka jingïakren kaba dang ïaid mynta shakhmat,” la pyntip u Borah ha Iingdorbar.
