Shillong, Lber, 05: U Myntri Rangbah ka Jylla Conrad K. Sangma ha ka sngi Balang u la ong ba ka jingangud jong ka Sorkar Jylla ban pynheh ïa ka Shillong Airport ha Umroi ka la long kaba seisoh.
Sa kumba 22 akar ka jaka ladep ban ithuh na ka bynta ban pynheh ïa ka surok pynher liengsuiñ na kaba don mynta 1,829 mitar sha ka 2,400 mitar khnang ba ki liengsuiñ kiba heh kin dup lah ban hiar khyndew bad kane kan pynjanai ïa ka jingpynïasoh ha ka leit ka wan bad kiwei pat ki jylla jong ka ri India, la pyntip u Sangma haba ai jingkren halor ka Mang Tyngka.
“Ka jingïakren ka dang ïaid shakhmat ban ïoh jaka shuh shuh na ka tnat Defense bad na ki paidbah,” u la ong.
Shuh shuh u Sangma u la pyntip ba ka jingthmu ban pyntreikam noh ïa ka Baljek Airport bad ka jingpyrshang ban pynher liengsuiñ manla ka sngi na Shillong sha Tura ladep ban shim rai.
Ïa ki Heliport ladep ban mang pisa ban shna ha New Shillong bad Tura bad ka jingtrei ruh kan sa sdang noh shen ula ong bad ïathuh ruh ba la mang pisa T. 63 klur na ka bynta ban pynjanai ka jingpynïasoh ïa ka leit ka wan lyngba ki liengsuiñ na ka bynta u snem 2025-26.
