Shillong, Lber, 27: U Myntri ka Sorkar Jylla uba khmih ïa ka tnad Bording u Abu Taher Mondal ha ka sngi Palei u la ong ba ka tnad ka dang ïai peitngor ban shim ïa ki lad ki lynti ban pynthikna ïa ka jingshngaiñ jong ka jingkieng ha pung Umïam.
Haba kren sha ki lad pathai khubor, u Mondal u la ong ba ka tnad Bording bad ka MeECL ki la pyrkhat bha sngewkhia ïa ka jinglong jingman jong ka Dam.
Katkum ka jingong jong u, ïa ki jingsngewkhia la lah ban pynduna hadien ba ladep ïa ka jingmaramot bad shna pynbha lyngba ka Dam Rehabilitation and Improvement Project (DRIP).
“Ngi la pyrkhing ïa ka jingïaid ki kali heh da kaba pyrkhat tang ïa ka jingshngaiñ jong ka Dam. Ngi ïai buddien. Ki briew jong ngi ki don hangtei bad ngi la buh wat ïa ka kynhun Pulit khnang ban pynthikna ba ka jingshngaiñ jong ka Dam kan long kaba biang,” ong shuh shuh u Mondal.
Haba pynpaw ba ka rta jong kane ka Dam ka dei ka mat kaba sngewkhia, u Myntri u la ong, “mynta ka jingkylli ka long kumno kan long ha ki por ban sa wan ynda la kut ka rta jong kane ka Dam, kane ka dei ka jingtynjuh namarba Dam ha pung Umïam ka sam um na ka bynta 216 Megawatt na ki saw tylli ki Unit jong ka pung bad kumjuh ruh ka Umtru Power Project ba thymmai kaba don hajan ka Byrnihat. Baroh ka um ka tuid arsut na ka pung Umïam. Kane ka dei kaba kaba sngewkhia. Ngi dang ïakren halor kane bad ïa mynta ngim pat shim satia ïa kano kano ka rai. Kyrmen ba yn sa ïakren bad ba kan sa don ka jingïamir jingmut hynrei ka teknoloji ka kylla stet, kumta ha kata ka rukom kin don ruh ki teknoloji ha kaba lah ban pynjlan shuh shuh ïa ka rta (jong ka dam) ruh hynrei watla katta ruh ngi dang sngewkhia.”
Shuh shuh, u Mondal u la pyntip ba la bynshet ha ka National Highways & Infrastructure Development Corporation Limited (NHIDCL) ban pynkhreh ïa ka Detailed Project Report (DPR) na ka bynta ban shna ïa ka surok ba thymmai.
“Nga tharai ka kam ka la ïaid shakhmat bad ngin sa ïoh da kawei pat ka surok bad ka long kaba donkam ruh namarba ïa kane ka jingkieng la shna bad pyntreikam ha u snem 1965. Ha kata ka por ka kit ka bah jong ki kali ruh ka dang long kaba duna haba pyrkhat ïa kata ka por ba la shna ïa ka jingkieng. Mynta ki kali ki la bun bad ki kit ïa ki jingkit kiba khia. Ngi donkam da kawei pat ka jingkieng kaba thymmai kaba lah ban shan slem lada ïaid ki kali kit mar kiba khia,” ula bynrap.
