Shillong, Jymmang, 12: Ka Meghalaya Pradesh Mahila Congress (MPMC) ka la ïai ban ban dawa ïa ka Sorkar Meghalaya Democratic Alliance (MDA) ba kan pyntreikam ïa ka jingpyrkhing ïa ka jingïohlad ban peit ïa ki phlim kynshleiñ khnang ban ïada ïa ki khynnah kynthei namar ka jingkiew shaba palat ka jingshah leh bei-ijot ha ka jylla.
Ha ka jingaiti ïa ka shithi pynkynmaw sha u Myntri Rangbah ka Jylla Conrad K Sangma ka President jong ka MPMC ka Kong Joplyn Scott Shylla ka ong, “da kaba burom ngi kyntu ïa ka Sorkar Jylla ban shim ïa ki sienjam ba kham tyngeh ban: pyrkhing ïa ka jingïoh peit ïa ki phlim kynshleiñ, khamtam ha ki mobile phone bad ki rynsan digital, ban pynsngewthuh sha ki skul bad ki shnong ki thaw kumno ban pyndonkam ïa ka Digital ha ka rukom kaba bha bad kaba shngaiñ, ban ïatreilang bad ki bor jong ka aiñ na ka bynta ban peitngor bad ban treikam kham stet ha kaba khanglad pyrshah ïa ka jingsaphriang ïa ki video ne ki dur ba ktah ïa ka longryngieng, ban pynjur ïa ka jingpynshai sha ki samla bad ki kmie ki kpa halor ka jingktah jong ki phlim kynshleiñ ïa ka bor pyrkhat pyrdaiñ bad ïa ka imlang sahlang.
Ka la ong ba ka MPMC ka ngeit ba jingkiew shaba palat ka jingpeit ïa ki phlim kynshleiñ kan pynkiew ïa ki kam runar leh be-ijot pyrshah ïa ki kynthei, khamtam da ki samla bad ki khynnah shynrang ba dang rit ka rta.
“Manla ka sngi, ngi sakhi ïa ka jinglong ba pynkulmar jingmut ha kaba ki khynnah rit ki leh ïa ki kam kiba pynmynsaw bad ki bym ïahap, namarba ka jingshah ïalam bakla ha ki jingïohi ïa ki jait kam ba isaitmet kiba lah ban ïoh Online ha ki mobile phone. Kane kam buh jingma tang ïa ka jingshngaiñ bad ka burom jong ki khynnah kynthei ha kylleng ka jylla hynrei ka pynpaw ruh ïa ka jingeh ha ka akor kaba dei ban weng mardor,” ong ka Kong Shylla.
Katkum ka jingong jong ka, ka jingtuklar ha ka por kaba biang kan ïada na kino kino ki jingsiew kaba pynsniewdur ïa ka imlang ka sahlang bad ban pynthikna ruh ïa ka sawdong sawkun kaba shngaiñ na ka bynta ki khun ki kti jong ngi, khamtam ki khun kynthei.
“Ngi kyrmen ba ka sorkar kan shimkhia mardor ban leh eiei halor kane ka kam bad ma ngi, kum ka shnat treikam jong ki kynthei ha ka party Congress ngi la kut jingmut ban ai jingkyrshan ïa ka sienjam halor kane ka kam,” la bynrap shuh shuh ka Kong Shylla.
