Shillong, Nohprah, 12: Ka Hynñiewtrep Youth Development Council (HYDC) East Jaiñtia Hills District ha ka sngi Thohdieng ka la pynbna ban pynlong da ka jingïaid rally kum ka jingpyrshah ïa ka jingthied jaka beaiñ da uwei u bar jylla ha ka shnong Daistong ban tei ïa ka karkhana pynmih dewbilat jong ka Shree Cement Private Limited.
Ha u kyrwoh ba la phah da u President ka seng u Bah Mihsalan Thoo sha ki lad pathai khubor, la pyntip ba kane ka rally ka ban sa long ha ka 16 tarik mynta u bnai kan sdang ha ka por 12 baje mynsngi na ka shnong Dkhiah bad yn sa pynkut hakhmat u durmot jong u Woh Kiang Nangbah uba don hajan ka ophis u Deputy Commissioner ka East Jaiñtia Hills District.
U la ong ruh ba ka seng ka pyrshah ban pynlong ïa ka Public Hearing da ka Meghalaya Pollution Control Borad ha ka 19 tarik Nohprah, 2025 hadien ba la ïoh jingujor na ki paidbah nongshong shnong ka shnong Daistong kiba dawa ba dei ban pynduh shisyndon ïa ka jingangnud jong ka Shree Cement Pvt. Ltd ban buh ïa ka karkhana pynmih dewbilat ha Elaka Nongkhlieh bad ban khlong ruh ïa u mawshun uba don ha ka elaka.
“Ka jingai NoC da u Waheh Shnong barim ka dei kaba la pynkhein ïa ka riti synshar shnong ka Daistong bad ka dei ka jingleh pyrshah ïa ka sur ki nongshong shnong jong ka shnong,” u la ong.
Kum ban shu pynkynmaw, u Waheh Shnong ka shnong Daistong u Bah Bunlang Phyrngap u la leit ujor sha ka ophis u Deputy Commissioner ka East Jaiñtia Hills District ban pyndam noh ïa ka NoC ba la ai da u Waheh Shnong barim.
Ha kaba ïadei bad kane, ka seng ka khot ka wer ïa ki paradoh parasnam ban ïa don lang ha kaba pyrshah ïa ka jinglilam ïa ka khyndew ka shyiap sha ki mynder shi sngi.
“Ka seng hi baroh kawei ka sngew ba ka jingdie duh ïa ka khyndew ka shyiap ka dei ka jingduhnong kaba khraw ïa ka jaidbynriew. Kaseng ka sheptieng ba ïoh lashai la shi sngi kane ka jingdie ïa ka khyndew ka shyiap kan pynlong pynban ïa ki nongshong shnong ka Elaka tang ki nongshongwai bad ki nongtong um bad ki nongthohdieng jong ki mynder, ha la ka shnong” la ong shuh shuh u kyrwoh.
