Shillong, Jylliew, 25: Ka Hynñiewtrep Youth Council (HYC) ha ka sngi Baar ka la ujor hakhmat ka Meghalaya Lokayukta pyrshah ïa ka Directorate ka Housing halor ka jingkynnoh ba don ka jingpyndonkam bakla ïa ka pisa u paidbah da kaba thied ïa ki tin sop iing Aluminium kiba jem, ïa kiba la sam sha ki community & Rural Development Block (C&RD) ha kylleng ka rilum Khasi bad Jaiñtia.
Ka HYC ka la kyntu ïa u Lokayukta ban bthah noh mardor ban phah pynphai noh ïa baroh ki Order jong ki tin sop iing ba la pynpoi da ka Hariana Iron Works Pvt Ltd sha ki C&RD Block bapher bapher ka jylla bad ban pynsangeh noh mardor ban sam ïa ki tin sop ïing.
Ha ka ujor, ka HYC ka la kyntu ruh ba dei ban thung ïa ka jingtohkit ba laitluid ha kaba ïadei bad ka jingthied bad sam ïa ki tin sop iing ba tad dor bad ba kito kiba donkti ki dei ban shah pynshitom katkum ka aiñ pyrshah ïa ka Director ka Housing lane ïa kino kino ki ophisar kiba donkti ban thied ïa ki tiar kiba tad dor bad ban thung ïa u Nodal Officer ban leit tohkit bad ban pynshisha ryngkat bad ki nongujor ha kaba ïadei bad ka jingsam ïa ki tin sop ïing ha kylleng ki C&RD Block ha rilum Khasi bad Jaiñtia.
Katkum ka dorkhas, u President ka HYC Bah Roy Kupar Synrem u la ong ba ka jingujor jong ka seng ka long hadien ba la ïoh pdiang ïa kiba bun ki jingujor ha kaba ïadei bad ka jingtaddor jong ka tin sopiing (Corrugated Aluminium Roofing Sheet) ba la ai sha ki C&RD Block bapher bapher kiba don ha kylleng ka jylla Meghalaya, khamtam eh ha rilum Khasi bad Jaiñtia.
“Namarkata, da kaba shimkhia ïa kine ki jingujor, ka HYC-CEC ka la leit jurip ha ki katto katne ki C&RD Block ba ka Hariana Iron Works Pvt. Ltd., Kolkata, West Bengal ka la pynpoi ïa ki tin sop ïing. La lap ba ki tin sop ïing (Aluminium Roofing Sheets) ba la pynpoi kim long satia katkum ka jingbthah da ka Directorate of Housing, Meghalaya,” u la ong.
“Ka hukum ka la kren shai ba ki tin sop ïing AA3105H18 Alloy, 8 Feet Length, 800MM Width, bad kiba ka jingrben ka dei ban long 0.45MM. Hynrei, ynda la leit tohkit, kine ki tin sop ing la lap ba ka jingrben ka long tang hapdeng 0.25MM haduh 0.28MM,” u la ong. bad bynrap ba ka Directorate of Housing ka la bthah ban thied ïa ki tin sop ing kiba rben 0.45MM, khnang ba kin long kiba neh slem ban sop ïa ki tnum iing.”
Shuh shuh u President u la kynnoh ba ka kompeni ba pynpo ïa ki tin sop ïing ka Hariana Iron Works Pvt. Ltd., Kolkata, West Bengal, kaba la ïoh kontrak kam dei satia kaba don jingtip thikna shaphang ki tin sop iing, kaba hap ban shim ïa ka jingkitkhlieh ban pynpoi ïa ki mar ki bym kot katkum ka jingbthah.
“Kane kan buh jingma wat ïa ka jingshngaiñ jong kito ki nongïoh pdeng kiba shaniah ha kine ki tiar,” u la bynrap.
