Shillong, Jymmang 27: Ki nongïalam ka AIM kiba dei ki ki nongmihkhmat jong ki Khasi Tribal ki la aiti ïa ka dorkhas sha ka KHADC ban pyrshah ïa ka jingpynlong kongsan ïa u Aadhaar ha ki Sixth Schedule Areas.
“Mynta ka sngi na ka liang jong ki nongïalam jong ka Awaken India Movement (AIM), Meghalaya State Chapter, kiba la mihkhmat ïa ki jaitbynriew riewlum Khasi, la ïoh ban aiti ïa ka dorkhas ba pura ha ka kti jong u Bah Shemborlang Rynjah uba long u CEM jong ka KHADC bad kumjuh halor u Bah Strong Pillar Kharjana uba long u Chairman jong ka KHADC, lem bad kiwei pat ki nongïalam jong ka Autonomous District Council (KHADC),” ong u Bah Banshai Maarbaniang.
Ka dorkhas ka kyntu ïa ka KHADC bad ïa baroh ki ADC kiba treikam hapoh ka Sixth Schedule jong ka Riti Synshar ka ri India ha Meghalaya ba kin mynjur da ka rai kaba pura (Resolution) halor kumno ban pyrshah ïa ka jingpynrung kyrteng (mandatory enrolment) bad ka jingpynïasoh ïa u Aadhaar na bynta ki nongshong shnong kiba sah ha ki jaka ba la ïada lyngba ka Sixth Schedule. Ki nongïalam ka kynhun ki la pynpaw ka jingsngewkhia kaba jur ba ka Sorkar Jylla Meghalaya kam shym la burom ïa ka rai jong ka Supreme Court, kaba kren shai ba u Aadhaar um dei ban long uba kongsan na ka bynta ki nongshong shnong jong ki jaka ba la buh ha ka Sixth Schedule.
Ki nongialam jong ka AIM kiba dei ki jaitbynriew riewlum Khasi ki la kdew shai ba ka Sorkar Jylla ka la leh ïa ka jingpynkheiñ ïa ka rai ba donburom lyngba ka ïingbishar ba ha khlieh jong ka Ri India kaba la tip kum ka Supreme Court bad ïa ka hok jong ka Riti Synshar ka Ri India (Indian Constitution).
Haba pynpaw halor kane ka mat, ki nongïalam ka AIM ki la pynpaw ba ka Supreme Court jong ka Ri India, ha ka rai ba kongsan jong ka, ka la pyllait ïa ki nongshong shnong kiba sah ha ki jaka ba don ha ka Sixth Schedule na ka jingpynrung kyrteng jubor lyngba u Aadhaar bad dei ban pynrung kyrteng katkum ka mon kaba laitluid khlem da ktah ïa ka jingpynduh ïa ka jingïoh ration lane kiwei kiwei ki skhim Sorkar. Ki la kynnoh ba ka sorkar jylla ka la pynkheiñ ïa baroh ar ki hukum jong ka Supreme Court bad ïa ka mynsiem jong ka Riti Synshar paidbah da kaba pynbor ban pynrung ïa u Aadhaar na ka bynta ban ïoh ïa ki skhim sorkar ba kongsan, kynthup ïa ka Public Distribution System (PDS) bad kiwei kiwei ki jingmyntoi jong ka bha ka miat halor ka imlang sahlang.
“Ka jingpynbor jong ka sorkar jylla ïa u Aadhaar kam dei tang ba ka long beaiñ hynrei ka buh jingma ruh ïa ka hok bad ka jingim jong ki nongshong shnong riewlum khamtam ïa ki briew kiba duk,” la ong u Bah Banshai Marbaniang uba long u Nongïalam jong ka AIM Meghalaya.
Bun ki longïing ki la shah kyntait ban ïoh ïa ki jingbam rashon bad ki hok jingïarap tang namar ba kim don ïa u Aadhaar card, wat hapdeng ka jingbthah kaba shai jong ka ïingbishar ba hakhlieh duh jong ka Ri India ka Supreme Court.
Ki nongïalam jong ka kynhun AIM ki la khot ban leh mardor katkum ka dorkhas halor ka KHADC bad baroh ki ADC ban mynjur ïa ka rai kaba pura kaba pyrshah ïa ka jingpynïasoh Aadhaar da kaba bthah ïa ki nongshong shnong ha ki jaka ba la buh ha ka Sixth Schedule. Kumjuh ruh ban kyntu ïa ka Sorkar Jylla ban sangeh noh mardor ïa baroh ki kam kiba pynlong ïa u Aadhaar uba donkam ban ïoh ïa ki skhim sorkar da kaba pynthikna ïa ka jingïada ïa ki hok riti synshar paidbah bad ban ïada ïa ki jingmyntoi jong ki jaitbynriew riewlum kiba don hapoh ka Sixth Schedule.
U CEM bad u Chairman ka KHADC ki la pynthikna ïa ka kynhun ba ka council kan shimkhia kyrkieh ïa kane ka kam bad kan ïasyllok bad ki riew shemphang ha ka liang ka aiñ ban pynthikna ba ka hok jong ki Khasi bad kiwei kiwei ki jaitbynriew riewlum kan ïada.
Ka Sixth Schedule jong ka Riti Synshar ka Ri India ka ai ka jingsynshar kyrpang ïa ki jaka riewlum ha ki jylla ka thaiñ shatei lammihngi, kynthup ïa ka Meghalaya, ban ïada ïa ki rukom im ba kyrpang jong ki ha ka kolshor bad ka imlang sahlang. Ka Supreme Court, ha ka rai Aadhaar jong ka, ka la kdew kyrpang ba ym dei ban pynlong kongsan ïa u Aadhaar ïa ki nongshong shnong jong ki jaka riewlum kiba dang hab hapoh ka khyrnit kaba hynriew (Sixth Schedule).
La pynkut ïa ka jingïatai da ka jingkut jingmut kaba skhem hapdeng baroh ki nongshim bynta ban bat ïa ka hok riti synshar jong ki jaitbynriew riewlum bad ban pyrshah ïa kano kano ka jingleh donbor ka ban pynduh ïa ka jinglong laitluid bad ka jingbha jingmiat jong ki. La khmih lynti ba ka Khasi Hills Autonomous District Council (KHADC) kan sa bishar bniah ïa kane ka dorkhas ha ka dorbar ban wan.
