Shillong, Nohprah, 05: Ka All Meghalaya Pharmacist‘s Association (AMPC) ka la pynpaw ïa ka jingpyrshah ïa ka jingpynbna paidbah ka Meghalaya State Skill Devlopment Society (MSSDS) ban ai jinghikai pyntbit ïa ki Pharmacist.
U nongai ktien jong ka Association u samla Emosjohn Syiemlieh ha u kyrwoh ba la phah sha ki lad pathai khubor ha ka sngi Thohdieng u la ong, “ngi sngewtynnat ïa ka jinghikai pyntbit ka MSSDS ïa ki samla ha ki course bapher bapher hynrei ha ka Pharmacy Assistant ïa kiba la pyni paidbah ha ki poster ngi la ju kren ynnai ai jinghikai ïa kane ka course namarba ka dei ka Proffessional Course.”
U la ong ba ka jingpule ïa ka course Pharmacist ka dei kaba eh. “Ki bynta jong kane ka Course ki don haduh 3 bynta lane haduh saw bynta haduh ban da ïoh ïa ka kyrdan Ph.D. namar ba ki don ki Diploma Pharmacist, ki B.Pharm ne Bachelor of Pharmacist, ki M.Pharm ne Master of Pharmacist bad Doctor of Pharmacist ne Ph.D.”
“Ka jingpyntyllun beit ka MSSDS ngim banse ban thoh sha ka tnat ka Koit ka Khiah ka Sorkar Jylla namarba kane kan pynjynjar ïa ki samla. Kane ka jingai jinghikai jong ki (MSSDS) ngam thikna ba ka la ïoh ïa ka jingmynjur na ka Pharmacy Council of India (PCI). Ka Proffessional Course kaba khyndiat eh ka dei haduh 2 snem hynrei kane ka jingai jinghikai (ka MSSDS) ka don tang lai haduh hynriew bnai bad kane ka long pyrshah ïa ka Pharmacy Act, 1948,” ong u samla Esmojohn.
“Ha ka Pharmacy Act, ka la batai shai ha ki kyndon bapher bapher bad lada phi dang ïai pyneh bad lada phin dang ïai pyntyllun ïa kane ka bynta kan buh jingeh ïa ki samla. Ngi isynei ïa ki samla namarba kam dei ka lynti ba kin ïoh ïa ka jingnang jingtip ha ka Pharmacist,” u la bynrap.
“Ngi ladep ban phah da ka jingthoh bym dei shuh ban dang ailad ïa kane ka jingai jinghikai bad ngi khanglad ruh ba kin leit Internship,” u la ong.
U la ong shuh shuh ba ki samla kiba leit internship ki dei ban pas ïa ka Diploma
lane Degree. “Hynrei haba phim don ïa kane ka kyrdan ngi khang hynrei ki don katto katne hadien ba ngi la khang ki leit sha ki bor bahalor. Ngim banse ban buh da ka jingthoh da kaba kdew ruh ïa ka Pharmacy Act 1948 katkum ka Section-2, ka Section-10,” u la ong shuh shuh.
“Kaba kham eh lada ki dang ïai pyneh, ka don Section-31, ka Section-42 ki don ki kyndon ba la khang pyrshah ba kine ki Professional Course yn ym lah ban shu leh jubor khlem da don ka kyrdan pule kaba biang,” u la pynshai.
“Ngi la kren bad shong jingialang na ka por sha ka por bad ki bor ba dei peit bad ngi kyrpad ïa ka Sorkar bad ïa ka Pharmacy Council ban pynlong noh ïa ka elekshon ha ka por kaba biang,” u la ong shuh shuh.
