Shillong, Naitung, 8: Ka All Primary School Teachers’ Association (AMPSTA) ka la pynpaw ïa ka jingpyrshah kaba jur ïa kano kano ka jingtyrwa ban pynduh pyndam noh ïa ka kam hikai skul Deficit.
Ka Seng ka la aiti ruh da ka dorkhas ha u Myntri ka tnat Pule Puthi u Rakkam A Sangma ha ka jingïalang kaba la long ha ka lah Sngi u Blei.
Ka kynhun jong ka AMPSTA ba la lamkhmat da u General Secretary Bah FC Shullai ka la pynpaw ïa ka jingpyrshah halor ka jingtyrwa ïa ka Meghalaya Education Grant (MEG) bad ïa ki mat kiba ktah ïa ki nonghikai skul.
“Ha ka jaka ban pynduh noh ïa kine ki post ngi kyntu ïa ka Sorkar ban pynneh bad ban pyndap ïa ki kum ki post deficit,” la ong u Bah Shullai ha u kyrwoh.
U la ong ba ka seng ka la pynpaw ïa ka jingsngewkhia ha kaba ïadei bad ka jingbteng na ka bynta ki nonghikai skul Deficit ba ki kam ba la shakri da ki nonghikai skul Deficit ba mynta kin ym shah ktah hynrei hadien ba la shongthait yn pynkylla ïa ka kam hapoh ka MEG. Kane ka pynmih ïa ka jingsngewkhia halor ka jingbteng jong kine ki kam bad ka jingshngaiñ kam jong ki nonghikai ha ki snem ban sa wan.
U Bah Shullai u la pyntip ba u Myntri ka tnad Pule Puthi u la pynshai ba lada ki bor pynïaid skul ki aiti lut ïa ki jingdon jingem sha ka Sorkar, ïa ki post ba la mang yn pynkylla sha ki kam Sorkar bad ki nonghikai kin long noh ki nongtrei Sorkar. Hynrei lada ki nongpynïaid kim aiti lut ïa ki jingdon jingem, ki nonghikai kiba la don lypa kin dang ïoh tulop kum ka Deficit hynrei hadien ba ki la shongthait ïa ka kam yn sa aiti hapoh ka MEG.
“Kane ka la buh jingeh shibun ïa ka seng ha kaba ngi kyntu jur ïa ka Sorkar ban pynmih ïa ki jingbthah kiba shai kiba pynthikna ïa ka jingshngaiñ ha ka kam bad ka jingbteng jong ka jingshakri na ka bynta baroh ki nonghikai skul Deficit kiba mynta bad kiba wan hadien,” u la bynrap.
U la pynpaw ruh haba pdiang bad sngewnguh ïa ka jingthmu jong ka Sorkar ban pynbha ïa ka pule ka puthi, ka seng ka pyrshah jur ruh ïa ki kyndon ki bym don ka jingshai, ka jinglong hok bad ka jingkitkhlieh.
U Bah Shullai u la pynpaw ïa ki katto katne ki jingeh ba kongsan jong ka seng kiba kynthup ïa ki kyndon ne ki jingbthah ki bym shai na ka bynta ka jingpynbha katkum ka jingtreikam ki lah ban pynmih ïa ka jingbym ïaryngkat na ka bynta ki skul kiba duna ka jingdon jingem, ka jingai bor ba pura sha ki School Managing Committee (SMC) ne ki Governing Body khlem ka jingpeit bniah bad ka jingkitkhlieh kaba lah ban lam sha ka jingpyndonkam bakla ïa ka Contributed Orovident Fund (CPF) ba la thep ha ka State Bank of India (SBI) Laitumkhrah Branch bad ka jingpynmih ïa ki hukum jingpynbna khlem da ai ïa ki jingbthah ba janai.
“Da kaba shim ïa kine ki jingeh, ngi kyntu ïa ka Sorkar ban ai ïa ki kyndon kiba shai bad kiba batai bniah na ka bynta ka jingai pisa katkum ka jingtreikam, ban pynbha ïa ki lad jingkitkhlieh ban pynbeit ïa ka bor jong ki SMC ne ki GB bad ban ïada na ka jingpyndonkam bakla ïa ka bor, ban pynthikna ïa ki lad jingïada ban ïada ïa ki hok bad ka jingshngaiñ ka kam jong ki nonghikai skul Deficit,” la ong u General Secretary.
Shuh shuh, ka AMPSTA ka la ïathir ruh halor ka Memorandum of Understanding (MoU) ba la ïasoi hapdeng ka tnad Pule Puthi bad ka Mother’s Union, Tura ha kaba ngi la pynpaw ïa ka jingsngewkhia bad jingbym ïahap jingmut ha kaba u Myntri ka tnad Pule Puthi u la pyntip ba ka Sorkar ka la shimkhia ïa kane ka kam bad kan ap ïa ka rai jong u Myntri Rangbah ka Jylla shwa ban ïaid shakhmat bad ban ïakren shuh shuh.
Ka AMPSTA ka la kyntu ïa ka Sorkar ba kam dei ban leh klet ïa ki nongrim jong ki skul bad ki nonghikai. Ïa ki polisi ba la shna khlem da ïamir jingmut kin wanrah tang ïa ki jingjyrwit jyrwat.
“Ngim pyrshah ïa ki jingpynbeit thymmai, watla katta dei ban ïamir jingmut bha bad dei ban ïada ïa ka hok jong ki nonghikai. Ngi kyrmen ba ka Sorkar kan pynbeit kloi ïa ki jingeh jong ngi ban lait na kano kano ka jingeh bad ban pynthikna ïa ka jinglong hok, kaba khuid bad kaba shai ha ka tnat Pule Puthi baroh kawei,” la pynpaw u Bah Shullai.
