Shillong, Nailur, 12: Ka Meghalaya Pradesh Mahila Congress ha ka sngi Thohdieng ka la pynpaw ïa ka jingpyrshah kaba jur halor ka rai jong ka Sorkar Jylla ban pynkylla ïa ka khajna halor ka kiad da kaba ong ba kane ka rai jong ka Sorkar Meghalaya ka lah ban pynshlur shuh shuh ïa ka jingdih kiad ïa ki shynrang bad kynthei.
“Kane ka jingai lad jong ka Sorkar ban kham pynbun ïa ki nong dih kiad ha ka jylla jong ngi ka long kaba sngewsih bad ka lah ban wanrah shibun ki jingeh ha ka imlang sahlang jong ngi,” ong ka President jong ka Meghalaya Pradesh Mahila Congress (MPMC) ka Kong Joplyn S. Shylla.
“Ka jingbym salia jong ka Sorkar ban wanrah ïa kum kane ka rai kan pynkha shibun ki ing ki sem ba dap da ka jingbym shong suk shong sain bad bun ki longïing kin sa pra . Ka ne ka jing thmu jong ka sorkar kan ktah shikatdei ïa ki khynnah bad ki hep barit kiba hap ban im ha ki jaka ba dap tang da ki jingkulmar. Ka lah ruh ban pynlong ïa ki ba kin ïaid ha ka lynti kaba bakla bad kane ruh kan nang pynkhlaiñ shuh shuh ïa ka dih drugs ki Khynnah samla kaba la nang kiew ha ka jylla ka jong ngi,” ka la ong.
“Ka Meghalaya Pradesh Mahila Congress ka kyntu jur ïa ka Sorkar Jylla ban pyrkhat biang halor kane ka rai bad ban buh ha khmat duh ïa ka bha ka miat jong ki longïing longsem, ka roi ka par jong ki khynnah samla ki heprit, ki longkpa ki longkmie bad ban khmih kham bha ïa ka imlang sahlang hapoh ka jylla Meghalaya,” la bynrap u kyrwoh.
