Shillong, Lber, 10: Ka Hynñiewtrep Youth Development Council (HYDC) ha ka Lah Sngi u Blei ka la pyrshah ïa ka jingthmu jong ka Sorkar ban pynlong Winter Capital ïa ka nongbah Tura, West Garo Hills District.
Haba kren sha ki lad pathai khubor, u Bah Shaniahlang Suchen u la ong ba ka jingpyrshah ka long namarba ka jinglut kan long da ki klur tyngka na ka daw ba ka jylla ka don ha ka jingdap ram.
“Ka jylla jong ngi kaba rit hynrei ka don pat sa ka ram kaba 22 hajar klur. Mynta kin (Sorkar) rah ïa ka Winter Capital sha Tura kan ap jingma ïa ngi ki nongshong shnong ka ri Khasi bad Jaiñtia. Lada kane ka urlong, ngin hap ban siew shiphew hajar manla u bnai ban pynkhuid ïa ka ram. Kine ki dei ki jingeh ba ngi ïohi lada urlong ka jingdawa jong ki paid Garo. Ki (paid Garo0 kwah ïa ka roi ka par hynrei kim tip ïa ki jingjia kiba shalyndet,” u la ong.
“Ngi sngewsih ban ïohi ba ki MLA na rilum Khasi bad Jaiñtia kim shym la pyrshah halor kane ka jingthmu ki MLA na rilum Garo ban rah ïa ka Winter Capital sha Tura. Ngim lah ban len ba ha Tura ladep shna ïa ka Mini Secrtariat bad ladep shna ruh ïa ka iingsah jong u Lat. Kane ka ladei lypa ka jingthmu jong ki nongmihkhmat bad ki sengbhalang ban rah ïa ka nongbah na Shillong sha Tura,” la ong u Bah Suchen.
U la kyntu ïa ki paid ka Bri u Hynñiewtrep ba kin ïatylli na ka bynta ban pyrshah ïa ka jingthmu ban pynlong Winter Capital sha Tura.
“Kan long ka jingduhnong kaba khraw ïa ka thaiñ jong ngi. Haba ngi dawa ban shna tang ïa ka Medical College ha Shillong ka sorkar kam don pisa hynrei ban rah ïa ka Winter Capital sha Tura hato ka (Sorkar) don pisa? la buh jingkylli u Bah Suchen.
“Ngi sngewsih ban ïohi ba ki MLA Khasi bad Jaiñtia kim don ka jingïatylli ban wanrah ïa ka roi ka par ha ri Khasi. Da ka mynsiem ba sngewkhia, nga kyntu ïa ki nongshong shnong, ïa ki nongmihkhmat ba ngi dei ban ïatylli ba kaei kaba ngi la don lypa ngim dei ban ailad ban rah noh shawei,” u la ong bad bynrap ba ki MLA na rilum Garo ki ïatylli na ka bynta ban wanrah ïa ka roi ka par.
