Shillong, Naiwieng, 28: Ka Jaiñtia National Council (JNC) Central Executive Committee ka pyrshah jur ïa ka jingpynsngew paidbah ne ka public hearing ban pynlong da ka Meghalaya State Pollution Control Board (MSPCB) na ka bynta ka jingtyrwa jong ka Shree Cement Ltd ban shna ïa ka karkhana pynmih dewbilat ba thymmai ha ka shnong Daistong kaba hap hapoh ka Elaka Nongkhlieh, East Jaiñtia Hills District.
Ka seng ka la kynnoh ba ka Shree Cement Ltd ka la shu shim beaiñ ïa ka jaka bad dawa jur ba dei ban pynsangeh noh shi syndon ïa ka jingthmu ban pynlong ïa ka public hearing kaba yn pynlong da ka MSPCB ha ka 19 tarik, Nohprah 2025 ha shnong Daistong.
Halor ka jingpyrshah jong ka seng ïa ka Shree Cement Ltd, u President ka JNC-CEC Bah Sambormi Lyngdoh ha ryngkat ki dkhot ki la aiti da ka jingujor ha u Deputy Commissioner ka East Jaiñtia Hills District u Shivansh Awasthi bad ha ka jingjuor ka seng ka la pynpaw ba ka pyrshah ïa ka jingthmu jong ka Shree Cement Limited ban tyrwa ïa ka Integrated Cement Plant ha shnong Daistong.
Ka seng ka la pynpaw ruh ïa ka jingthied jaka beaiñ da uwei u riewshimet u bym dei u trai ri, uba kyrteng u Bharat Sharma, ïa ka jaka na u trai jaka uba kyrteng u Syrpailang Sukhlaiñ, kumba la batai bniah ha ka kaiphod jong ka Environmental Impact Assessment (EIA) kaba la aiti ha ka 19 tarik, Naiwieng 2025, kaba la aiti ruh sha ka tnad treikam jong ka jylla.
Kane ka jingkhaïi ka pynkheiñ ïa ka Meghalaya Transfer of Land Regulation Act, 1971, kaba khang pyrshah ïa kum kine ki jait jingpynkylla khlem da ïoh jingbit na ki bor ka aiñ bad na ki bor ba dei peit (competent authority), bad na ka Jaiñtia Hills Autonomous District Council (ADC), ong u kyrwoh na ka seng.
U President ka JNC u kynnoh ba ka EIA kam don ïa ki kot ki sla kiba kongsan, ba kynthup ïa ka jingmynjur jong ka ADC, ki kot ki sla jong ka jingkylla dur, lane kano kano ka jingbit katkum ka aiñ jong ka Meghalaya Land Transfer Act, 1971, kaba pynlong ïa ka jingïateh ka ban long kaba khlem jingmyntoi naduh kaba sdang. Ka seng ka kdew shuh shuh ïa ki jingpynkheiñ ïa ka aiñ (MIIPA) 2024, kaba kren shai ba kam dei ban pynkheiñ ïa ka aiñ 1971 bad ka jingpynbna ka EIA, 2006.
Ka seng ka kynthoh jur ïa ka Meghalaya State Pollution Control Board namar ka jingbym leh hok ïa la ka kamram kaba ka tnat ka la leh khlem da bishar bniah ïa ka jinglong trai jaka, kaba la aibor pynban ïa ki company ban leh palat bad khlem burom shuh ïa ka hok jong ki riewlum kaba katkum ka Article 371B jong ka Riti Synshar.
U la ong ba ka seng ka kyntait ruh ïa ki jingkular ai kam jong ka Shree Cement Ltd bad ong ba ka dei kaba ym lah ban shaniah da kaba kdew sha ki jingduna ha ka jingtbit jong ki briew ha ka thaiñ namar ba ki jaka ki dei kiba kham bun ki dei ki jaka rep bad kiba bun ruh ki nongshong shnong ki dei ki nongrep suda, ka jingbym don ki plan ai jinghikai bad ka jingbym leh ei ei jong ka sorkar halor ki polisi thung kam, kaba ka seng ka la dawa ha ka thup jong ka Save Jaiñtia Mission kaba la sdang naduh 2024 ba donkam ban shna ïa ka aiñ thungkam thungjam kiba thymmai hapoh ka thaiñ bad ban thaw ïa ki lad kamai jakpoh ïa ki nongshong shnong na kine ki jait company.
Ka JNC ka maham jur bad byrngem ban pynlong da ka jingïakhih lada ka projek ka ïaid shakhmat khlem da pynbeit ïa kine ki jingeh, da kaba buh ïa ka sorkar ba kan shim ruh ïa ka ka jingkitkhlieh na ka bynta kano kano ka jingkhihwin kaba mih na ka jingbym ïahap ha ka rukom treikam.
“Hadien ba la ai ïa ka jingthoh, ka seng ka la ïa kynduh ïa u Deputy Commissioner, uba la pynthikna ba un shim khia ïa kane ka kam, ban rah sha ki bor ba halor bad ban ai ïa ka kopi jong ka jubab jong u sha ka seng hapoh khyndiat sngi bad ngi dawa ba dei ban tohkit mardor ïa ka jinglong trai jaka, ka jingshisha jong ki kot ki sla bad ki jingbthah sha ka MSPCB bad ka bor peit bniah ïa ka mariang jong ka jylla (SEIAA) ban pynsangeh noh mardor ïa ka jingpynsngew paidbah (public hearing). Kumba ka jingthoh ka pynpaw ïa ki jingma kiba lah ban buh ïa ki nuksa kiba shyrkhei na ka bynta ka jingshim jaka hapoh riewlum” ong u President ka JNC-CEC.
