Shillong, Rymphang, 26: Ka Jaiñtia Student Union (JSU) Central Body ha ka sngi Balang ka la kren shai ïa ka Sorkar Pdeng bad ïa ka Northeast Frontier Railway (NFR) ba kim dei ban pynpoi ïa ka lynti Rel sha rilum Jaiñtia katba ym pat lah ban wanrah ïa ki aiñ kiba khlaiñ ki ban ïada na ka jingrung kyrthep jong ki briew kiba nabar shapoh ka Jylla.
Kane ka jingpyrshah, jong ka seng, ka long hadien ka jingmih khubor ba ka NFR ka thmu ban sorjamin ïa ka lynti Rel na Bhoksong, Rajagoan, Baithalangso, Jengkha, Kherani bad Umrangso ka ban pynïasoh shaduh ka sor Jowai.
Ka JSU ka la kyntu ruh ïa ka Jaiñtia Hills Autonomous District Council (JHADC) ba kam dei satia ban ai ïa ka No objection Certificate (NoC) sha ka NFR na ka bynta ka lynti Rel katba ka Sorkar kam pat lah ban pyntreikam ïa ka Inner Line Permit (ILP).
Ka Seng ka la ai jingmut ruh ïa ka Sorkar Pdeng ban ai noh da ki Medical College, Engineering College bad kiwei kiwei de ki jingdonkam ha ka jaka jong ka lynti Rel.
