Shillong, Naiwieng, 26: Ka Khun Hynñiewtrep National Awakening Movement (KHNAM) ka la pyrshah ia ka jingpynrung kyrteng ia ki Ex-servicemen na ka jylla Manipur bad kiwei kiwei ki jylla da ka Meghalaya Zilla Welfare Department.
Ha ka shithi ba la phah sha u Secretary ka General Administration Department u Bah Cyril V Darlong Diengdoh ha ka sngi thohdieng, u general secretary ka KHNAM u Bah James MA Neng u la ong, “ngi la ioh jingtip ba ka ZWD ka la buh hakhmat ia ka bit ka biang jong ki Ex-servicemen na kiwei ki jylla bad pynduh pat ia kajuh ka hok sha ki shipai ba la shongthait na kane ka jylla. Ka jingshisha ka long ba u ophisar ka Zilla Sainik Welfare na Manipur um dei ban long ka daw ban pynduh ia ka hok ia la ki jong ki shipai ba la shongthait ban ioh ia ki jingmyntoi katkum ki kyndon treikam jong ka Kendra Sainik Board.”
U la ong ba ka party ka la ioh jingtip ba ka Zilla Welfare Department, kaba long ka ophis kaba hap hapoh ka jingpeit jong ka GAD ka la pynrung kyrteng ia ki shipai ba la shongthait na ka jylla Manipur.
“Ngi sngewsih ia ka jingiaumsnam ha Manipur bad ngi duwai ba ka shongsuk shongsaiñ kan wan phai biang ha kane ka jylla. Hynrei, na ka daw ka jingiaumsngam, ngi la ioh jingtip ba ki don bun ngut ki shipai ba la shongthait na ka Jylla Manipur ki la rejistar bad ka Meghalaya Zila Sainik Department. Ha kawei pat ka liang, ki shipai ba la shongthait na ka jylla Manipur ki dei ban pynrung kyrteng hi la ka jong ka jylla khnang ba kin dup lah ban ioh ia ki jingmyntoi ba la ai na ka por sha ka por ha la ka jong ka jylla,” ong u Bah Neng.
Une u nongialam ka KHNAM u la ong ba ka Kendra Sainik Board ka ai ruh ia ka riti treikam jong ka Department of Sainik Welfare ha manla ki jylla bad ki Union Territories na ka bynta ka jingmyntoi jong ki shipai ba la shongthait ha la ki jong ki jylla ki jong ki.
