Shillong, Naitung, 09: Ka Khasi Students Union (KSU) East Jaiñtia Hills District Unit ha ka sngi baar ka la aiti da ka dorkhas ha u Deputy Commissioner jong ka East Jaiñtia Hills District ban pyrshah ia ka jingioh No Objection Certificate (NoC) da ki katto katne ki briew ban shna pynbha ia ka jaka mane blei ha ka jaka Sorkar.
Kane ka jaka ba la thmu ban tei ia ka jaka mane blei ka don hapoh u pud u sam jong ka District Court, Khliehriat bad ha syndah ka ophis Deputy Commissioner.
Ia ka dorkhas la aiti da ka seng ha u Deputy Commissioner hapoh ka jingialam jong u General Secretary u Bah Kwilnis Suciang.
Ha u kyrwoh ba la phah sha ki lad pathai khubor, ka seng ka la iathuh ba ha ki snem ba ladep ka dei tang ka jaka mane blei ki nongtrei surok kaba tang shipor hynrei hadien ba kine ki nongtrei surok ki la leit phai noh kane ka jaka mane blei ka la iai bteng da ki katto katne ki bar jylla ki la tei beaiñ ia ka jaka mane blei.
La pynpra noh ia kane ka jaka mane blei ha ki snem ba ladep namarba ym shym shym la ioh jingbit na ki bor sorkar.
Ka Seng ka la iathuh ba haduh mynta ka dang don ka jingker sawdong da ki tin ia ia ka jaka mane blei bad la ioh jingtip ruh ba mynta ki bar jylla ki la ioh jingbit kumba 500 sq feet bad ki dang pan sa 250 sq feet ban shna sa ia ka jaka leit bar.
Kum ban shu pynkynmaw ba ia kane ka jingtei jaka mane blei ha ki jaka sorkar ka Sorkar Jylla ka la pynmih da ka Office Memorandum (OM) ha u snem 2010 katkum ka Special Leave Appeal (Civil) no 8516 of 2006 ba la rai da ka Supreme Court. Lyngba kane ka Sorkar ka la shna ia ka polisi ba ia ki jaka mane blei lah ban shim wai ha kaba yn hap ban siew shisien siew 25 percent katkum ka dor iew jong ka khyndew lane 494 tyngka shi square feet kaba yn bthah bad ban pynbeit da ka tnat Revenue jong ka Sorkar Jylla.
Hynrei katkum ka Office Memorandum la thoh shai ruh ba ia ka polisi kan treikam tang haduh u snem 2006 kaba mut ia ki jingtei ba palat une u snem la dei lupa kiba la long beaiñ katkum ka para 5.
“Ka jingdon lypa ka jaka mane blei mynta da ki snem ka la pynkheiñ lypa ia ka ain namar ka jingdon jong ka dei ka bym ioh jingbit bad kaba la pynkheiñ ia ka Meghalaya Public Premises Unauthorised Occupation Act 1980,” la ong ka KSU.
Ka seng ka la banjur ia u Deputy Commissioner ka la ban jur ba ia ki jaka Sorkar hi ym dei ban ai jaka ban tei ia kino kino ki kynhun niam halor ka nongrim ba ka lah ban wanrah ia ka jingñiew shiliang bad ka jingbym sngewthuh jingmut.
Ka seng ka maham ba lada ia kane ka jingtei ia ka jaka mane blei ka iaid shakhmat ka seng kan sa khot ia kiwei pat ki riewshimet ne ki kynhun ba kin pan noh ia ki jaka kiba dei jong ka Sorkar bad ban tei ia la ki jong ki iing ne ki jaka mane jong ki hapoh East Jaintia Hills District.
Na ka liang jong u Deputy Commisisoner u la mynjur ban pynsangeh shwa ia kane ka jingthmu bad ban dang wad kham bniah halor kane ka kam na ka Sorkar.
Ka Seng ka la maham ba daleilei ym bit ban ai jingbit ban tei ia ki jaka man blei ha ki jaka Sorkar kiba dei ki ‘Public Premises’ bad ka Seng kan iai buddien ruh halor kane.
