Shillong, Nailur, 28: Ka Elaka Narpuh Youth For Change (ENYFC) ka kynhun kaba dang shu dep pynkha ha ka Elaka Narpuh kaba peit ïa ka bha ka miat ki khun samla jong ka Elaka Narpuh ka la ieng pyrshah ïa ka Public Hearing jong ka Star Cement Meghalaya Limited (SCML) na ka bynta ban tih mawshun ba la tip kum ka ‘Brishyrnot Limestone Deposit -II kaba don ha ka shnong Brishyrnot, Elaka Narpuh, East Jaiñtia Hills
Ha u kyrwoh ba la phah da u President bad u Secretary ka Elaka Narpuh Youth For Change, ka jingpyrshah ïa ka jaka tih mawshun ka long ba ka jaka kaba la tmu ban tih mawshun kaba heh haduh 65 Hectares ha Brishyrnot ka long ka jaka ba ïajan bha bad ka Wah Lunar kumba 20-30 metres. Lada lada shah ban tih mawshun ha kane ka jaka kan long ka jingtim ïa ka mariang namar ka Wah Lunar kan rngad noh bad ka Wah Lukha kaba jngai kumba 500-600 metres na kane ka jaka kan mad ruh ïa ki jngeh kumba mad ka Wah Lunar.
Ka kynhun ka la ong ba ka Star Cement LTD kawei ka karkhana kaba heh tam hapoh North East kam juh kheiñ snep ïa ki briew jong ka Elaka Narpuh bad barabor kam juh aikam ïa ki trai shnong bad ki trai Elaka Narpuh bad kiba ïoh ban trei ha kane ka karkhana ruh ki long tang kito kiba ïajan bad ki bor pynïaid ka karkhana bad kam juh ai ïa ki post baheh sha ki trai shnong bad ki trai Elaka, bunsien ka ai tang ïa ki post Grade IV kum ki Cleaner, Peon, Gardener, Driver. Kam juh ai ïa ki post baheh sha ki trai shnong nalor ba mynta bun ki trai shnong ki la long kiba la nang la stad ha ka pule puthi kum ki Engineer, M.Com, MBA.
“Ka jingwan bad ka jingdon ki karkhana pynmih dewbilat hapoh Elaka Narpuh ka long tang ka jingtim ïa ki khun ka Elaka namar ki shu kamai spah bad kim juh burom ïa ki trai shnong trai Elaka bad bunsien tang ka dewbilat ban shna iing ruh kim juh ai ïa ki trai shnong bad ïa ki trai ka Elaka,” la ong ka ENYFC.
“Ki karkhana kiba don ha Elaka Narpuh khamtam ïa ka Star Cement ka pyndonkam da ka divide and rule policy khnang ban suk ban pyntrei bad pynïaid jong ka,” la ong ka kynhun bad bynrap, “lada ailad ban tih mawshun ha Brishyrnot kan ktah ïa ka Wah Lunar bad Wah Lukha bad khamtam ïa ka Narpuh Wildlife Sanctuary bad ka Narpuh Reserved Forest. Kan ktah ïa ka lyer khuid kaba mih na khlaw na btap jong ka Narpuh Reserved Forest bad yn ïoh pynban da ka lyer jaboh (Carbon Dioxide) ïa ki nongshong shnong. Kan ktah ruh ïa ki dohim dohwah kiba don ha Wah Lukha bad kan long ka jingtim ïa ki briew kiba im ja da kaba khwai ha Wah Lukha,” la bynrap ka kynhun.
“Katkum ka jingkular jong ka Star Cement ka long ban aikam ban aijam ïa ki trai shnong bad lada peit ïa ka Meghalaya Industrial policy Act ka long ba ki trai jylla ki dei ban ïohkam haduh 60% hynrei katkum ba long mynta ki trai shnong trai Elaka kiba trei ha star cement ki long tang 20% bad 80 % ki dei ki bar jylla,” la kren bynñiaw ka kynhun.
“Na kitei ki daw ka Elaka Narpuh Youth For Change kan pyrshah jur ïa ka Public Hearing jong ka Star Cement ka ban long ha a 08/10/2024 ha Brishyrnot bad lyngba une u kyrwoh ka kynhun ka khot bad wer ïa ki paradoh para snam khamtam ïa ki paitbah ka Elaka Narpuh bad ki sengbhalang kiba don ha Ri Khasi Jaiñtia ban pyrshah jur ïa kane ka public hearing jong ka Star Cement khnang ba kan ym long ka jingtim ïa ka pateng ban wan,” la ong shuh shuh u kyrwoh.
