Shillong, Nailar, 22: Da ki hajar ngut nonghikai skul Lower Primary na ki skul Deficit kiba don hapoh ka shatri jong ka All Primary School Teacher’s Association (APSTA) ha ka sngi Thohdieng ki la ïaid rally ban pyrshah ïa ka jingwanrah jong ka Sorkar Meghalaya Democratic Alliance (MDA) ïa ka Meghalaya Education Grant (MEG) kaba pynduh noh ïa ki jingmyntoi bad khamtam eh ka jingpynduh ïa ka post nonghikai ha ki skul Deficit ha baroh kawei ka jylla.
Ïa ka jingïaid rally la sdang nakhmat ka Jail Road Boy’s Higher Secondary School bad la pynkut ha khmat ka iingdorbar ha Golflink, Shillong.
Ka Asst. General Secretary jong ka APSTA ka Kong Vigonia Nongpluh ha ka jingïakren bad ki lad pathai khubor ka la ong, “ngim pyrshah lut ïa kaei kaei kaba don ha ka Meghalaya Education Grant hynrei ka jingsngewkhia ka long namar ka jingpynduh noh ïa ki post nonghikai ha ki skul Defict.”
“Kumba ki pynpaw ba ki nonghikai kiba mynta kin ym shah ktah hynrei ynda ki la shongthait bad ïa ka post yn pynkynriah noh sha ka MEG. Ngi don hangne mynta ban dawa ïa ka sorkar ba kan ai ha ngi ïa ki kyndon kiba shai ïa kaei kaba la ïakren,” ka la bynrap.
U General Secretary ka APSTA u Bah FC Shullai u la ong ba ka APSTA ka la pynlong ïa ka State Executive Committee ban ïakren halor ka jingpynhiar ïa ka rta jong ki nonghikai skul Deficit na ka 60 sha ka 58 snem. “Ïa kata ngi la ïakren bad ka sorkar ka la weng noh ïa kata ka rai bad ba ki nonghikai skul Deficit kin ïoh lut ïa ki jingmyntoi katba ki dang don ha ka kam,” u la bynrap.
“Haduh mynta ngim tip satia kiei ki kyndon treikam jong ka Meghalaya Education Grant,” la ong shuh shuh u Bah Shullai bad bynrap ba ka jingpyrshah jong ka seng ka long halor kata ka nongrim.
“Ngin dawa ïa ka Dearness Allowance na ka Sorkar bad ngin ym shongthait,” u la ong shuh shuh.
Haba kylli, u Bah Shullai u la ong ba ka APSTA ka la pynlong ïa ka jingïakhih ba jaijai tang ha ki district bad lada ka sorkar ka dang ïai leh kuman ka seng kam banse ban pynlong ïa ka jingïakhih ha ka jylla baroh kawei.
U President jong ka Meghalaya College Teachers Association u SK Pradhand u la ong ba ka seng ka ai jingkyrshan pura ïa ka jingïakhih jong ka APSTA.
U Babu Kular Khongjirem uwei na ki nonghikai skul ba la shongthait ha kane ka sngi u la ther tyngeh ïa ka Sorkar Jylla kaba la wanrah bujli da ka Meghalaya Education Grant bad ong ruh ba kane ka jingthmu jong ka Sorkar kan pynduhnong ïa ka lawei jong ki nonghikai bad ïa ka pule puthi ha ka jylla baroh kawei.
Ka APSTA ka la buh jingkylli ruh ïa ka sorkar halor ka CPF/CPS Account nalor kaba dawa ruh ba ka Sorkar ban ai ïa ki CPS Account Number jong ki nonghikai skul Deficit, ban siew ïa ka Arrear D.A kaba 46% bad 49% bad ban pyndap ïa ki post nonghikai ba la shu sah thylli.
