Shillong, Nailur 07: Ki paidbah nongshong shnong jong ka Tura, West Garo Hills District ha ka shithi ba ki la phah sha u Myntri Rangbah ka jylla u Conrad K. Sangma ki la dawa ban ïoh ïa ka jingbishar kaba hok ha kaba ïadei bad ka Tura Medical College.
Ha ka shithi, ka Tura Garo Senior Citizens Forum ka la pynpaw ba ka la mih shakhmat ban ïoh ka jingbishar kaba hok ha kaba ïadei bad ka Tura Medical College. Ka la ong ba ka la sakhi ïa kiba bun ki jingeh ba mad da ki paid Garo ha ki snem ba la leit na ki daw ka kam saiñ pyrthei.
“Mynta ngi ïalum lang na ka bynta ban pynpaw ïa ki jingeh ba la mad da ki paidbah bad ka jingthmu ban kyntiew ïa ka thaiñ da kaba wanrah ïa ka Tura Medical College & Hospital (TMCH) bad ka jingthmu ban phah pynïaid ha ki riew shimet hapoh ka Public-Private Partnership model (PPP-mode),” ki la ong.
Ki la buh ruh ka jingkylli ba balei ïa ka Shillong Medical College (SMC) kaba la tei pynbha bad kaba la plie bad kaba dei ruh ka jaka pule ba pynïaid da ka sorkar katba ka TMCH, kaba dei kajuh ka project la aiti ban pynïaid da ki riew shimet. Hato ka Tura kam don ïa kajuh ka hok ha kaba ïadei bad ki lad pynroi.
La ong ruh ba ki la ïohi dang shen ba ka Myntri ka tnat ka Koit ka Khiah ka Kong Ampareen Lyngdoh ha ka jingkren paidbah ka la ong ba kumba ka long mynta dang ap ïa ka No Objection Certificate (NOC) na ka National Medical Council (NMC) ban pynsdang noh ïa ka snem pule kaba 2025-26 ka Shillong Medical College.
“Ka la pynbna ruh ba kumba 15 haduh 16 ngut ki doktor ka sorkar ki la shah thung kum ki Associate Professor, bad la thaw ruh ïa ka Medical College Council bad kiba bun ki committee, bad na ka liang ka tnat ka la dep ban pynbeit ruh ïa ki jingsiew bad ka la buh ruh ïa ka Fees Committee kaba peit hapoh ka tnat Health and Family Welfare,” ong ka kyrwoh khubor.
Ki la kyrpad ïa u Myntri Rangbah ban bishar biang ïa kane ka kam ban phah pynïaid ha ki riew shimet ïa ka TMCH lyngba ka PPP-mode, ong ka kyrwoh na u General Secretary ka Tura Garo Senior Citizens Forum, u L C Momin.
