Khliehriat, Lber, 06: Da ki spah ngut ki paidbah ryngkat lang bad ki dkhot ka Jaiñtia National Council (JNC) ba la lamkhmat da u President u Bah Sambormi Lyngdoh ha ka sngi Palei ki la ïaid rally rah lama ïong ha Khliehriat, East Jaiñtia Hills District ban pynpaw ka jingpyrshah ïa ka jingthmu jong ka Sorkar ban pynpoi ïa ka lynti Rel sha ri lum Jaiñtia.
Ha ka jingïalang ba la pynlong hakhmat u durmot jong u Kiang Nangbah ha Khliehriat, u nongïalam ka JNC Bah Sambormi Lyngdoh u la kynthoh ba ka jingkwah jong ka Sorkar ban pynoi ïa ka lynti Rel shapoh rilum Jaiñtia ka dei ka jingthmu ban pynsuk ïa ki karkhana dewbilat bad ïa ki nongkhaii heh spah bar jylla kiba leh ïa ka khaïi ka pateng hapoh ka district.
U President ka JNC u la byrngem ruh ban ïalap pyrshah ïa ka Sorkar MDA ba la ïalam da ka NPP ha u snem 2028 lada ka shlan ban pynpoi ïa ka lynti Rel sha East Jaiñtia Hills District.
“Lada phi shlan ban leh da ka bor, kum ka seng ngim don lad shuh da kumwei pat hynrei ngin ïalap pyrshah ïa phi ha u snem 2028. Nga kwah ban pynkynmaw ïa phi ba dei ki paidbah kiba donbor ban shim ïa ka rai bad kin dei ruh ki paidbah kiba lah ban knieh na phi ïa ka bor,” u la ong.
Shuh shuh u la takraiñ tyngeh ruh ïa ki hynñiew ngut ki MLA na rilum Jaiñtia halor ka jingbym lah ban leh eiei ïa ka jingdawa jong ki sengbhalang bad ka Sorkar.
“Lada ka Executive Committee jong ka Jaiñtia Hills Autonomous District Council (JHADC), ka ai ïa ka No Objection Certificate (NoC) ban pynpoi ïa ka lynti Rel sha rilum Jaiñtia ka seng kan pynlong ka jingïakhih da kaba tur sha ophis treikam jong ka District Council bad ka seng kan pynibor ruh wat ïa ka Sorkar ban ïada ka la lawei jong ka ri bad ka jaitbynriew,” ong u President ka JNC.
U la ong ba ka seng ka la long ba la khreh lada ka Sorkar ka leh da ka bor bad lada ki nongmihkhmat ki leh pyrshah ïa ka sur jong u paidbah.
“Ngim pyrshah ïa ka roi ka par, hynrei lada kata ka roi ka par ka buh pat ïa ngi ha ka jingma khamtam ïa ngi ki ritpaid ngi kloi ban pyrshah. Ngi phah ïa ka khubor kaba shai sha u Myntri Rangbah ka Jylla Corad Sangma ba u dei ban sangeh noh ïa ka jingthmu ban wanrah lynti Rel sha East Jaiñtia Hills District katba ym pat lah ban pyntreikam ïa ki aiñ ki ban ïada ïa ka khaïi ka pateng, ki aiñ ki ban ïada ïa ngi na ka jingshah tyllep ha ki mynder. Kane ka dei ka khubor kaba shai sha u Myntri Rangbah ka jylla,” ong u Bah Sambormi Lyngdoh.
“Katba ka JHADC kam pat lah ban ai ki jingïada ha ka khaïi ka pateng bad lada ka Sorkar kam pat lah ban shna ïa ki aiñ ban ïada, kum ka ILP, ban lait na ka jingshah tyllep ha ki mynder bad ki briew kiba nabar, ngim lah satia ban pdiang ïa ka lynti Rel bad kane ka dei ka khubor kaba shai sha u Myntri ka Sorkar Jylla Bah Kyrmen Shylla kumba u la dep ong ba un burom ïa ka sur jong ki paidbah. Hynrei ka sur jong ki paidbah kiba kyrshan ïa ka JNC bad ka sur na ka JNC ka long ba ngi pyrshah ïa ka lynti Rel bad lada wanrah jubor ïa ka lynti Rel sha rilum Jaiñtia ka seng kam banse ban ïaid da kano kano ka lynti,” la maham u President ka JNC.
Haba phah ïa u kyrwoh sha ka Sorkar ba ka Rel kam long tang ma ka, kaba wanrah ïa ki kam pynroi, u Bah Sambormi u la ong, “lada phi (Sorkar) kwah ban ai ha ngi ïa ki kam pynroi, ai ha ngi ïa ka pule puthi kaba bha, ki jaka sumar kiba bha, ka surok kaba bha, kine kin long ki jingkyrkhu ïa ki briew jong ngi bad ka thaiñ baroh kawei.”
U President ka JNC u la pynkynmaw ruh halor ki san tylli ki mat jingdawa lyngba ka Save Jaiñtia Mission ba kynthup ka jingdawa ban pynkhlaiñ ïa ka JHADC, ban pynrung ïa ka ktien Jaiñtia ha ka State Anthem bad ha ka State Language Act, ban shna ïa ki polisi ha kaba ïadei bad ka thungkam thungjan hapoh ki karkhana dewbilat, ban pynbeit noh ïa u pud u sam hapdeng ka Jaiñtia bad ka Assam da kaba pynshongnongrim na PRE 1951 Jaiñtia Hills Map bad ban shna noh da ka Small Scale Coal Mining Policy.
Ki dkhot jong ki sengbhalang kiba la ïashim bynta lang ha kane ka rally rah lama ïong ki kynthup ïa ka JYF-Saipung Circle, MPUF- EJHD, FKJGP-Khliehriat Circle, All Biate Students Association (ABSU), United Hynñiewtrep Movement (UHM) East Jaiñtia Hills, ka East Jaiñtia Hills Taxi Drivers Association (EJHDA) bad ka ka Meghalaya Indeginous Women’s Council (MIWC).
Ha ka jingïalang la ai jingkren ruh da u President ka FKJGP Khliehriat Circle Bah Micheal Chyrmang, ka President jong ka Meghalaya Indeginous Women’s Council ka Kong Bythygrace Dkhar, u President jong ka East Jaiñtia Hills Taxi Driver Association Bah Satly Ryngkhlem,u nongïalam jong ka All Biate Students Association u Theodore Darnei, u President ka UHM Bah Brosent Siangshai bad kiwei kiwei.
