Shillong, ïaïong, 07: Ka Boxing Association of East Khasi Hills District (BAEKHD) ka la long ka kynhun ban ïohrah ïa ka nam lahduh ha ka rynsan ïakura jong ka Mawshbuit Invitational Boxing Competition 2025 ba la pynïaid da ka Mawshbuit Boxing Club ryngkat ka jingïatreilang bad ka Boxing Association of East Khasi Hills District kaba la long ha dong Nongpdeng, Mawshbuit ha ka 4 tarik bad ka 5 tarik, Ïaiong, 2025.
Ka Boxing Association of East Khasi Hills District ka la ïohrah ïa kane ka jingjop da kaba ïoh khur 25 tylli ki takma, ba kynthup 9 tylli ki takma ksiar, 4 tylli ki takma rupa bad 12 tylli ki takma rnong, katba ka Mawshbuit Boxing Club kaba la wan baar ka la ïoh khur 4 tylli ki takma ksiar, 7 ki rupa bad 6 ki takma rnong, ka Upper Shillong Boxing Association kaba la wan balai ka la ïoh khur 4 ki takma ksiar bad takma rupa bad kawei kawei ka takma rnong.
Ka Green Heart Boxing Club kaba la poi ha ka kyrdan kaba saw ka la ïoh khur 11 tylli ki takma ba kynthup ïa ki 3 tylli ki takma ksiar, 4 tylli ki takma rupa bad 4 ki takma rnong bad ka Rising Star Boxing Association ka la ïoh khur 3 tylli ki takma ksiar, 4 tylli ki takma rupa bad 3 tylli ki takma rnong.
Ïa ka khusnam Best Boxer ha ka liang jong ki shynrang la ïoh khur da u Leo Fernando Nongkhlaw bad na ki kynthei ïa ka nam Best Boxer la ïoh rah da ka Sophia Suchiang.
Ha kane ka rynsan ïakura la sakhi lang da u MLA jong ka Mawryngkneng Constituency u Bah Heavingstone Kharpran uba la long kum u kongsan ryngkat ka jingsynran lang jong MDC ka Sohryngkham u Bah Bill Clinton Wankhar, u Joint Secretary jong ka Boxing Federation of India u Bah Larry kharpran uba long ruh u Technical Director jong ka Meghalaya Boxing India bad kiwei kiwei kiba la shah khot sngewbha.
