Shillong, Nailar, 16: Ka St. Anthony’s Higher Secondary School, Shillong ka la long ka kynhun ban ïoh rah ïa ka nam lahduh ha ka 1st Inter School Football Tournament, 2025 ba la pynlong da ka St. Mary’s Higher Secondary School, Mawpdang hadien ba ka la lah ban pynliem noh ïa ka Don Bosco, Smit.
Ha kane ka lympung ïalehkai kaba la pynlong ha ka 15 tarik, Nailar, 2025, ïa ka nam Best Player, Top Scorer, Best Goalkeeper, Best Defender la ïoh khur da u Pynkmen, u Jason Paswet, u Meshan, u Ezra Ryntathiang kiba dei ki khynnah skul jong ka St. Anthony’s Higher Secondary School, Shillong bad ïa ka nam Discipline Team la ïoh rah da ka Tynring Presbyterian Higher Secondary School.
Ha ka jingpynlong pat ïa ka jingïaid march past ha ka liang jong ki shynrang, ka Tynring Presbyterian Higher Secondary School ka la ïohrah ïa ka nam lahduh, katba ka St. Mary’s Higher Secondary School, Mawpdang ka long ka kynhun ban ïoh rah ïa ka kyrdan kaba ar bad ha ka liang jong ki kynthei, ka Don Bosco Secondary School, Mawkasiang ka la ïohrah ïa ka nam lahduh katba ka St. Joseph Secondary School, Mawiong ka la ïoh rah ïa ka kyrdan kaba ar.
Ha ka Patriotic Act, ka St. Mary’s Higher Secondary School, Mawpdang ka la ïohrah ïa ka nam lahduh bad ka Don Bocso Secondary School, Mawkasiang ka la ïohrah ïa ka kyrdan kaba ar.
Ïa ki khusnam la sam da u MLA jong ka Mawrynkneng Constituency u Bah Heavingstone Kharpran uba la long kum u kongsan ha kane ka sngi bad u Bah Artist Kharumnuid uba la long kum u symbud Kongsan.
