Shillong, Naitung, 30: Ka Meghalaya Pradesh Congress Committee (MPCC) ka la pynbna ba kan dang bteng ban ïakhun ïa ka mukotduma pyrshah ïa ki MLA ryngkang diengkper, kynthup ïa u Bah Ronnie V Lyngdoh, uba dang shu leit ban pynïasoh sha ka National People’s Party (NPP).
U Secretary ka MPCC u Bah Manuel Badwar u la pynpaw ba ka party ka ngeit ba ka aiñ jong ka ri ka dang treikam bad kin ym shah pynthut ha ka rai jong u Bah Ronnie Lyngdoh ban leit pynïasoh sha ka NPP.
“Da ka jingleit pynïasoh u Ronnie V Lyngdoh sha ka NPP, ngi hap ban sdang biang ïa ka mukotduma baroh kawei…ngi la don ïa ki nongrim kiba biang bha ban ïakhun pyrshah ïa ki lai ngut ki MLA (u Dr. Celestine Lyngdoh (Umsning), u Bah Gabriel Wahlang (Nongstoiñ) bad u Bah Charles Marngar (Mawhati)), kiba la iehnoh ïa ngi. Ngi ngeit ba kane ka kam kan kham jwat hynrei ngin hap ban buddien namarba ba ngi don ka jingngeit ba ka aiñ jong ka ri ka dang im,” la ong u Bah Badwar ha ka jingïakren bad ki lad pathai khubor ha ka sngi Balang.
Katkum ka jingong jong u, ka politik ba shu thied da ka NPP kan ym ieng halor ka aiñ jong ka ri.
Shuh shuh u Bah Badwar u la pynpaw ba ka MPCC kam don jingsngew lyngngoh shuh ïa ka jingshim rai jong u Bah Ronnie Lyngdoh ban pynïasoh sha ka NPP da kaba kdew ïa ka jingbym kyrshan jong u ïa u kyrtong jong ka party ha ka elekshon MDC.
U la bynrap ruh ba ka party kan nym khot ïa ki nongïalam kiba buh hakhmat eh ïa ka jingmyntoi shimet ban ïa ki rukom treikam bad ïa ki nongrim jong ka party.
“Ngi kubur ïa ka jingmih noh jong u, ym don ba lah ban len ïa kata hynrei ban ong ba ngi la sngewlyngngoh, ngam tharai ba ngi la sngewlyngngoh satia namar naduh ka elekshon MDC, ngi la ïohi ba ka jingpyrshang jong u ïa u kyrtong jong ngi ka Bah Banphira Basaïawmoit kam shym la don satia. Ha ka jingshisha, ki la don shibun kiei kiei kiba pynthut bad kiba la jia ha kata ka bynta. Kumta ka jingmut baroh kawei ka long lada phi kylli ïa ngi kaba bun ki riew saiñpyrthei ha ka jylla ki dang ïai bteng ban bud ïa ka jingmyntoi shimet ban ïa ka mat saiñ pyrthei kaba long kaba kongsan,” ong u Bah Badwar.
Wat haduh kane ka khep, u Bah Badwar u la ban jur ba ka MPCC kan dang ïai bteng ban trei bad ban pynkhlaiñ ïa ka jingdon jong ka ha ka jylla.
U la kyntu ïa ki nongkyrshan jong ka Congress ha Mylliem ba kim dei ban duh noh ïa ka jingshaniah, da kaba pynpaw ba ka jingïaishah bad ka jinglong ba janai jong ka Meghalaya Congress kan ieng biang shisien ka sngi.
Ka party ka thmu ban pynbeit thymmai, ban tei thymmai, bad ban pynïoh biang ïa ka jinglong nongïalam jong ka ban mihkhmat ïa ki paidbah ka Meghalaya.
U Bah Badwar u la pynpaw ïa ka jingkhlaiñ jong ka seng Congress ha ka kyrdan jong ka ri, ha kaba ki don 99+1 ngut ki MP bad u la pynpaw ïa ka jingngeit kaba skhem ba ka Congress kan ïoh jaka biang ha Meghalaya ruh kumjuh.
U la ong ba ka jingdon jong ka MPCC ka shong nongrim ha ka jingangnud jong ka ban mihkhmat ïa ki paidbah bad kan dang ïai trei sha kata ka thong.
“Ngim don nongmihkhmat shuh lait noh tang u MP jong ngi. Ngi donkam ban wan phai biang. Ha Garo Hills, ngi dang ïoh jaka bad suki suki, ngin dang ïai bteng ban nang pynkhlaiñ bad kum ka party, ngam ngeit ba ngi la duh eiei bad ha ka jingshisha ka dei ka kabu kaba biang tam na ka bynta jong ngi ban ïoh jaka,” ong u nongïalam ka MPCC.
Ha kajuh ka por, ka Working President jong ka MPCC, ka Deborah Marak ka la kyntait ïa ki jingkynnoh ba ka don ka jingeh ha ka jinglong nongïalam hapoh ka seng Congress, da kaba pynpaw ïa ka jingtreishitom bad ka jingaiti lut jong u President ka party.
Ka la pynshong nongrim ïa ka jingphet seng jong ki MLA ha ka jingshah khroh ha ka NPP kaba donkam da ka bor pisa bad ong ba ka party kam lah ban khanglad ïa ki MLA ban shim ïa la ka jong ka rai ha ka synshar paidbah.
Ka Marak ka la kyntait ruh ïa ki jingkynnoh ba ka Congress ka la khang ïa ka jingtreikam jong ka ha Meghalaya na ka jingduh noh ïa ki MLA jong ka. Ka la kdew ba ka jingjop jong ka party ha ka elekshon MP, watla kam don MLA, hynrei ka pyni ïa ka jinglah ban ïaleh pyrshah bad ka bor jong ki paidbah ha ka synshar paidbah.
Ka MPCC ka dang trei ban pynbeit thymmai ïa ka party bad pdiang sngewbha ïa ki nongïalam barim bad ki MDC barim, ki MLA barim na Garo Hills ban wan phai biang sha ka party.
Ka banjur ruh ba jingkhang jong ka party ka plie bad kan dang ïai bteng ban pynkhlaiñ shuh shuh ha ki shnat treikam.
