Shillong, Naiwieng, 13: Ka jingïalang ba la pynïaid da u Chairman thymmai ka Meghalaya State Planning Board (MSPB) u Abu Taher Mondal ka la rai ban buddien ïa ki kam kiba ladep bthah ïa ki tnad bapher bapher ha ki jingïalang kiba ladep.
Ha ka jingïalang kaba la long ha ka sngi Palei ha Main Secretariat, Shillong ka Board ka la rai ban pan kaiphod na ki tnad bapher bapher halor ka jingdheng kali, ka jingpyntuid khyndew sha ka wah Umngot da ka NHIDCL bad kiwei kiwei ki tnad kiba hakhmat.
Ha ka jingïalang la ïashim bynta lut da ki Co-Chairman, ki Dy. Chairman bad ki dkhot jong ka MSPB kiba la ai ïa ki jingai jingmut, la pyntip u Co-Chairman jong ka MSPB Bah John F. Kharshiing.
U Principal Secretary Bah FR Kharkongor, u la pynshai ruh halor ki rai ki barim jong ka Board bad ka MSPB ka la rai ban ïakynduh biang ha u bnai Nohprah, hadien ba la ïoh ïa ka jubab na ki tnad halor ka jingtreikam jong ki halor ki jingai jingmut kiba bun na ka Board kaba ladep ban phah sha ki tnad treikam bapher bapher.
