Shillong, Rymphang, 17: Ki nongïalam jong ka Raid Saw Ksing Saw Lama ha ka Lah Sngi u Blei ki la phah da ka jingujor sha ka Khasi Hills Autonomous District Council (KHADC) ban dawa ba dei ban pynbeit thymmai biang ïa ka Khasi Hills Autonomous District (Nomination, Successionand Election of Syiem, Deputy Syiem, Lyngskor, Bakhraw, Sordar Shnat Raid, Longsan Mansan Shnat Raid, Rangbah Shnong or Sordar Shnong and Adminstration of Khyrim Syiemship) Act, 2024.
Ha ka jingïakren bad ki lad pathai khubor, ki nongïalam jong ka Raid ki la pyntip ba kane ka jingdawa ka long hadien ba ki la pyrshah ïa ka jingpynbna ba la pynmih na ka ophis jong u Lyngdoh ka Raid Mawshai halor ki lai tylli ki kyndon, ba la pynduh noh ïa ka kyntien Raid jong ki 12 Raid bad la shu thoh ba kin long noh tang ki shnat Raid bad la pynduh noh ïa ka bor ka iktiar ban peit ïa ka khyndew ka shyiap bad nalor kata la pynduh ruh shibun ïa ki kyrteng jong ki longkur kiba long ki longsan hapoh ka Raid.
Ha kaba ïadei bad kane, ki nongïalam jong ka Raid ki la rai ruh katba u Syiem jong ka Hima Khyrim um pat lah ban pynbeit ïa kane kam, ki 12 Raid kin ym shah shuh ban thoh phlang ban sop ïa ka ingsad ha Smit, ban ai blang sha u Syiem bad la rai ruh ba ki khun ki hajar kin ym noh synniang shuh sha ka Hima.
