Shillong, Risaw, 17: Ka Kashari jong u Special Judge (POCSO), Jowai, ha ka sngi Thohdieng ka la rai pynrem da kaba hukum ban set phatok 10 snem ïa u Gentlyness Paslein uba sah ha ka shnong Nongryngkoh hapoh ka Section 4 jong ka POCSO Act, 2012, halor ka jingdonkti ban leh be-ijot ïa iwei i heprit kynthei.
U kyrwoh ba la phah da u Superintendent of Police, ka West Jaiñtia Hills District sha ki la pathai khubor u la pyntip ba ki Pulit ki la ïoh pdiang ïa ka ejahar na ka kmie jong i lanot ha ka 11.01.2016, kaba la kynnoh ba u Gentlyness Paslein u la leh beijot ïa i khun kynthei ba dang 7 snem ka rta ha ingsah jong ki. Ïa ka case la register ha Jowai Police Station hapoh ka Section 4 jong ka POCSO Act bad ïa ka jingtohkit la bynshet ha ka WPSI R.M Suchiang kaba la pynngat kyndon ruh ïa u nongshah mudui.
Ka Kashari ka la daiñ kuna ruh 10 hajar tyngka ïa u Gentlyness Pasleiñ bad lada um lah ban siew ïa ka kuna, un hap ban bteng ïa ka jingshah set phatok sa 6 bnai.
