Shillong, Naiwieng, 02: Ka Balang Catholic ha ka pyrthei baroh kawei ka la rakhe kynmaw burom ki mynsiem ba la khladnoh ha ka sngi U Blei da kaba pynlong ïa ki jingduwai ba kyrpang na ka bynta ka jingjahthait ka mynsiem jong ki.
Ha nongbah Shillong, ka Cathedral Parish, Laitumkhrah ka la rakhe ïa kane ka sngi da ka jingknia Mass bakyrpang na ka bynta ki mynsiem ba la khladnoh ba la pynbynta da u Archbishop ka Jyllaniambah Shillong u Most Rev. Victor Lyngdoh ryngkat ka jingsynran lang jong ki Lyngdoh Sohblei bad ki riewniam.
La sakhi ruh ba ki bahaing hasem ki la ïalum sawdong ki lum jingtep ban buh syntiew bad ban thang ïa ki mombati na ka bynta ki baieid bathoin kiba la khladnoh.
Hadien ba la wai ka Mass Bakhuid, u Archbishop ryngkat bad ki Lyngdoh Sohblei ki la synreit da ka umkhuid um kyntang ïa ki lum jingtep katba ki bahaiing hasem ki dang ïalum sawdong ki lum jingtep ban duwai na ka bynta ka jingjahthait bymjukut jong ki baieid bathoin jong ki.
