Shillong, Nailar 16 : Ha ka sngi Thohdieng, ban bteng ïa ka jingleh ba manla u snem hapoh ka Dorbar Shnong Riatsamthiah ka la ïoh ban rakhe ïa ka Independence Day da ki prokram bapher bapher.
Ïa ka prokram la sdang da ka Walkathon ha ka por 6. 30 mynstep ba la pynlong da ka Seng Kynthei ban pynshlur ïa ki paidbah ban ïaid barabor da ka kjat. Ïa ka jingkyntiew lama la sdang ha ka por 9 baje mynstep da u Dr (Rev) R F Kharkrang uba la ai ka khana ba lyngkot ba kumno ka shnong Riatsamthiah ka la sdang na ka shnong barit ha ki spah snem ba 1900 bad ki jingnoh synniang sha ka jingïakhun laitluid ka Ri India.
Ha kane ka sngi khlem da klet ïa ka tnat pulit, la pynkupburom ruh ïa ki napoh ka Lumdiengjri PS & Lumdiengjri Traffic Branch.
La pynkupburom ruh ïa ka Miss Iasanialang Passah ba la poi ha ka kyrdan 5th position ha ka BSc Honours Zoology bad ïa Dr (Rev) Revan Field Kharkrang ba la ïoh ka kyrdan Doctor of Divinity na Bukiram City Church Bangkok Thailand, bad kiwei kiwei ki prokram.
Ha katei ka sngi la ïoh ka jingkren na u Rangbah Shnong u Bah M Kharkrang uba la pynpaw ka jingai khublei ïa ki nongshong shnong bad khamtam eh ba ki la lah ban pynlong biang ïa kane ka jingrakhe ha kane ka sngi.
“Ha kaba nyngkong ka seng samla ka shnong, hadien ba ka la trei borbah ban pynkhreh nadong shadong, ki la pynpaw ka jingduh jingkyrmen naba ïoh pynthut ka jinglong ka suiñbneng, hynrei ka long pat kaba phylla ha kane ka sngi ba U Blei u la kyrkhu pynban da ka suiñbneng kaba itynnad, kumta kane ka pyni ba ngi dei ban shah niah ha U Blei haba ngi pyrshang ban leh ïa kaba bha,” pynkut u Rangbah Shnong.
